郭政鴻06年同結婚3年嘅廣州小姐冠軍李欣穎離婚，事隔一年就同滕麗名拍劇撻着，雖然佢兩個從冇公開承認拍拖，但喺圈中佢哋已經係公開嘅一對。不過，有雜誌影到鴻仔早幾日同前妻及一個9個月大嘅B女同行嘅相，話鴻仔同前妻去中旅社幫B女攞回鄉證，而B女個名叫郭X欣。報道仲話鴻仔年幾前暗中翻兜前妻兼生埋女，令滕麗名癡心錯付。
鴻仔06年同前妻離婚之後第二年，就同滕麗名因為拍劇而撻着。
滕麗名因為魏駿傑（圖）另結新歡而分手收場，家鴻仔又翻兜前妻，感情路上波折重重。
「我會盡父親責任」單新聞前日曝光之後，鴻仔一直未有回應，直至噚日，佢終於同馮仁昭聯絡，承認被影到嗰個BB係自己個女，鴻仔話：「我係有個女，我會盡父親嘅責任。」問佢係咪同前妻喺埋一齊，鴻仔一概以私事為由唔回應，佢話：「感情事我一向唔講，呢啲係自己嘅私事，所以唔會回應或者交代，今次講完之後亦唔會再講，我唔想因為自己嘅事影響到屋企人，佢哋唔係圈中人，冇必要承受呢啲壓力，總之要交代嘅人我已經交代咗。」問佢家同滕麗名究竟係乜嘢關係，鴻仔話：「由始至終都係好朋友，我哋從來都冇講拍拖，到家都係好朋友，永遠都係好朋友。」問佢前日點解玩失蹤，連夜晚《廉政行動2009》首映都唔出現，鴻仔就解釋自己真係病咗唔舒服喎。
