上個禮拜日係滕麗名同金融才俊老公朱建崑（Matthew）結婚一週年紀念，佢當日就喺微博自爆失驚無神都飛咗轉台灣食嘢，唔使估都應該係同老公去慶祝啦！前日星期日佢就繼續同老公喺香港享受二人世界，拍拖去尖沙嘴shopping。
睇特價貨
下晝4點左右，見到紮起馬尾打扮樸素嘅阿滕，同老公喺新港中心一間專賣高爾夫球運動服裝嘅專門店行街，佢兩個一入到去就有專人招呼，兩個先喺櫃枱揭catalog睇嚇有乜新貨，揭咗一輪之後，老公就走咗去特價貨區，見到做緊6折嘅羽絨大褸同T恤，似乎好有興趣，阿滕都好貼心咁逐件幫老公拼上身，仲不停畀意見，試完背心又試外套，阿滕仲趁老公走入試身室試衫先至行開揀嚇自己嘢。
【即場試衫】
朱建崑唔介意喺試身室出面就笠件衫上身。
【對鏡狂照】
著起羽絨照唔停嘅阿滕，揀一件衫都考慮咗好耐。
【笑容滿瀉】
雖然話警覺性好高，但阿滕同老公傾起上嚟又點收得埋個笑容呢！
做咗人妻嘅阿滕警覺性依然好高，一見有人經過舖頭，佢都好緊張咁望嚇，見到人真係睇衫喇，佢先至放低戒備心自己去揀衫。老公試完衫出嚟時，有幾秒阿滕都放低戒心好嗲咁同老公講嘢，仲一副甜笑樣，不過唔夠一陣佢又變番木口木面。
舊年喺泰國結婚嘅阿滕，話咁快就做咗人妻一年啦！
對鏡狂照
唔知係咪預備同老公一齊去旅行過白色聖誕，阿滕全日都係專攻羽絨，試咗好多個顏色，睇嚟佢對其中一件羽絨情有獨鍾，對住塊鏡照咗好耐，售貨員當然好識做猛落嘴頭，不過佢哋喺舖頭試足成粒鐘都未揀啱款。
採訪、攝影：畢紹基、梁繼光
from:
http://hk.apple.nextmedia ... 141216/18970235
