郭政鴻掂滕麗名

滕麗名早前在網誌自爆感情世界重回一片空白，頓時惹來她與男友郭政鴻分手的傳聞。據悉滕滕與鴻仔只是耍花槍，為女友，鴻仔日前特別到商場揀選卡地亞手錶送給滕滕。昨日記者問他是否已掂女友時，鴻仔笑說：「都冇事發生啦！」看來兩口子已雨過天青。

當日下午3時許，郭政鴻一支公到九龍塘又一城商場閒逛，他先到香港唱片睇碟，剛巧該店電視機正播放米高積遜（Michael Jackson）影碟，鴻仔遂與大批途人駐足欣賞，睇足5分鐘後，鴻仔再往電影區揀影碟，但未有收穫，之後他再站到電視機旁欣賞MJ的MV，其間有兩位女fans認出他，即上前找他簽名合照，他也表現得十分樂意，有求必應。

逛完碟舖後，鴻仔先往Levi's睇褲，然後再往附近的高時錶行睇名錶，見鴻仔左揀右揀後，睇中兩隻女裝卡地亞鋼錶，他拿起左拼右拼後，又向女店員問長問短，估計是準備送錶番女友。他在錶舖逗留了15分鐘後，仍拿不定主意，遂將手錶交還店員，然後再往其他店舖挑選禮物。記者昨日致電鴻仔，問他是否準備買錶送給滕麗名時，他未有否認說：「見到隻錶幾靚，咪睇吓囉！」是否已經番女友？鴻仔笑道：「唔需要，都冇事發生啦！」看來他與滕麗名的小風波已經雨過天青。
憶MJ一面之緣

另外，鴻仔當日在唱片舖睇MJ的MV睇到忘形，問他是否其忠實fans？他說：「佢嘅歌舞真係好勁，家好多歌手都係抄佢。其實當年佢嚟香港參觀TVB，我有機會近距離見佢一面，本來想搵佢簽名，但佢嗰班個個成6呎幾嘅保鑣唔畀埋身。佢離開咗大家先識得珍惜，都覺得幾可惜㗎！」