今屆港姐質素有目共睹，甚至有人話今年唔係選靚女，而係測試緊班化妝師同造型設計師嘅能力，不過講到娛樂性喎，都總算幾豐富嘅。好似呢頭先有讀者狂數「油浸梁安琪」1號曾曦寧品格麻麻，轉頭又話「大汗徐淑敏」3號鄭寶源借唱K撬人牆腳，噚日又有讀者提供「大口梁芷珊」10號李姿敏蒲吧攬仔嘅照片，睇唔出口齒伶俐、外表斯斯文文嘅佢，原來都有狂野嘅一面。
捉實男性朋友條頸嘅李姿敏（箭嘴示），玩得好癲。
李姿敏約埋成班女仔clubbing，佢件低胸衫最搶（右二）。
狂晒身材
李姿敏同男性朋友貼實影相，睇吓男仔個樣勁冧。
呢位21歲、嚟自紐約嘅海外佳麗李姿敏，浸過鹹水係零舍唔同，連舉止都豪爽過人。從照片所見，當日佢約埋三五知己、拖男帶女clubbing，成班索女之中，佢肯定係最出位嗰個，着住藍色低胸tubedress嘅佢，狂晒身材之餘，仲不時成個人挨埋個男仔度，又捉住對方條頸嚟影相，睇吓男方個樣冧到呢。之後佢哋又黐埋影合照，男方對眼咪成一線，就知佢酒不醉人人自醉啦！睇嚟李姿敏冧仔都有啲本事噃。
