人生有幾多個十年？黎耀祥等了兩個十年有多，才等到今日做男主角的機會。
沒有馬德鐘的高大身形，也沒有吳卓羲的俊朗外貌，45 歲的黎耀祥單憑演技便已贏盡觀眾歡心。繼去年《秀才愛上兵》一人分飾兩角後，祥仔在無綫劇集《巾幗梟雄》飾演的市井流氓柴九又再帶給觀眾驚喜，被不少網友睇好成為視帝。首次擔正做男主角的祥仔，形容柴九是自己演藝生涯中最喜歡的角色，雖然柴九沒有好下場，但祥仔認為這是個最完美結局，也為自己能夠經歷柴九這段不平凡的人生說句：「此生無憾。」
正如柴九在《巾幗梟雄》所言：「人生有幾多個十年！」一世人，也許就是等一個機會。努力了24 年，黎耀祥終於等到一個機會──一個好劇本、好角色、一班好拍檔、一次擔正做男主角。在《巾幗梟雄》中，祥仔飾演一個為生存而拋棄尊嚴、咬住狗骨扮狗吠的市井流氓柴九，雖然柴九憑住小聰明而成為一代梟雄，但為拯救一直深愛的蔣家四奶奶（鄧萃雯飾），柴九的結局將非常凄慘，據悉他會在劇中慘死。
一代梟雄完美結局
柴九沒有好下場，祥仔認為是一個最完美的結局，他說：「其實柴九同四奶奶（蔣家四姨太康寶琦）之間嗰段係不一樣嘅男女感情，世俗嚟講係唔容許佢哋結婚或者談論戀愛，但兩個掙扎求存嘅人互相扶持去行佢哋要行嘅路，當中夾雜咗親情、好倚賴嘅感覺，比愛情更昇華。到最尾，四奶奶都有陪柴九行完人生最後嘅路。」
近日祥仔在TVB 網誌中，談到自己的「第一次」（首次做男主角），他說：「看了第一集《巾幗梟雄》，拍攝時的情景再次湧現，回憶總是沉重的，變幻莫測的柴九，掙扎求存的奮鬥，多姿多采地寫出一段不一樣的人生。雖然演得不夠完美，但總算經歷一段不平凡的歷練，此生無憾！」
柴九為生存不惜咬狗骨爬地，將尊嚴置諸腦後。劇照
九咬狗骨痛足三日
用到此生無憾這個形容詞，想必祥仔對今次表現也十分滿意。祥仔一臉認真說：「睇番自己演嘅角色，就好似旁觀者睇番自己人生，好似人死後靈魂走出嚟睇番自己。我成日諗演戲同人生嘅關係，雖然話演戲係假，但喺做嘅過程中，同樣好真實咁去經歷，例如咬住狗骨去跑，真係好辛苦，雖然話分開拍，但唔差好遠，跑完一身汗，對腳痛足三日。又好似運米上山淋雨，或者係沉落湖底再游番上嚟，真係冇晒力。編劇寫得咁豐富，柴九經歷過咁多呢啲場面，自己真係好似經歷咗一段人生，只係最尾唔係真係死，所以自己有啲感觸，覺得此生無憾。柴九係我演藝生涯中最深刻最鍾意嘅角色，以前演過嘅戲，從未試過咁大上大落。」
去年祥仔成功奪得無綫台慶頒獎禮最佳男配角，今年又可想更上一層樓，憑柴九奪取視帝寶座？祥仔笑說：「頒獎禮有好多客觀條件嘅，我睇得好通透，每個藝員只係一隻棋子，公司鍾意點擺就點擺，六叔想郁你就郁你，我好樂天知命，唔會今日上咗做男主角就唔做第二、第三線，總之公司安排我做乜就做乜，因為呢個遊戲係咁玩。」
入行多年沒是非沒緋聞，只一味默默耕耘，形象正氣，是演技之外觀眾喜歡祥仔的原因之一，但做娛樂圈不應酬不埋堆，豈非十分蝕底？祥仔不認同說：「其實打個和啫，除非本身好鍾意social ，譬如出去social 應酬食飯，唔通餐餐都係人哋請咩，食10 餐你都起碼請番一餐啦，咁即係要使錢，你工作賺錢又使番喺度，咁咪打和！我應酬少啲賺少啲，應酬多啲賺多啲，但又會使番落應酬度，在我嚟講，夠咪算囉。」
思想主導演戲變化
不論《西遊記》中的情聖豬八戒，還是《楚漢驕雄》中又自卑又自大的韓信，祥仔每次演出，總能帶給觀眾不一樣的感覺。要成為一個百變演員，祥仔認為不能單靠演技，他說：「最好嘅演出就係真實。近年自己已經唔係諗點樣去演或者設計一個角色，而係人究竟係乜嘢？為乜而生存？演員係去解剖人物，每個角色有佢人生同生存價值觀，有啲新人演極都演唔好，我覺得係因為佢哋缺乏咗對人性、人生嘅睇法，講得高深啲，係人生哲學嘅觀念。角色同人一樣，都係經歷緊一段生命，所以我諗角色唔係諗點去表達，而係諗佢點樣思考、點生存、點生活？由咁樣去考慮一個角色。老實講，我演過咁多類型角色，乜嘢方法都用過，如果只係停留喺方法上，咁係冇進步，點郁嚟郁去都好，黎耀祥始終係黎耀祥個樣，做100 個唔同嘅款好未？我都唔止做過100 套戲，咁點去變？點昇華？唯一從你嘅心態思想去將整個人物嘅感覺、態度再重新有個睇法走出嚟，而唔係諗兩句口頭禪，整一、兩個古古怪怪表情去搶戲。」
柴九《巾幗梟雄》
2009 年
「我演藝生涯中最複雜、最跌盪嘅角色，畀我經歷咗一段多采多姿嘅人生。」
戴從文/ 戴從武《秀才愛上兵》
2008 年
「首次一人分飾兩角，難度好高，拍攝過程都好辛苦，但對我而言係一項新嘗試，好有滿足感。」
韓信《楚漢驕雄》
2004 年
「一個好有戲劇性嘅歷史人物，雖然出身貧窮，但係係個打仗奇才，內心轉變由自卑到自大，一個好好玩嘅角色。」
豬八戒《西遊記》
1996 年
「用咗一個不同角度去睇豬八戒這個人物，原來佢係情聖，佢鹹濕舉動背後原來有佢嘅因由。」
鄧乃強《水餃皇后》
1995 年
「一個十分可愛、純真同善良嘅人物，雖然最後因為癌症逝世，但令人十分懷念。」
江堃東《情陷特區》
1991 年
「係我第一個可以融入環境嘅角色，劇中我飾演知識分子，當年到內地拍攝外景，未埋位期間，我真係不期然拎本書出嚟睇。」
祥仔最喜愛的六個角色
柴九推薦四大精采場面
1)穩定民心
蝗蟲為患，在冇收成冇米下自然導致米價上升，蔣家四奶奶康寶琦（鄧萃雯飾）擔心村民搶米，為穩定軍心，寶琦於是造了一個假米倉，內裏其實是空心的，只擺了一些真米在外面來瞞騙村民，令無錫村民不會因冇米而引起混亂，更成功拖延時間等待由外地運米到無錫。
2)大難不死
故事中段部份，我踢爆了蔣家大少爺蔣必文（敖嘉年飾）與蔣家舅少彭鏗（李成昌飾）的情婦孫海棠（胡定欣飾）有染，必文因此對我更懷恨在心，不惜買兇殺我，聘請了一位職業殺手用刀刺我心臟，然後在我腳上綁上重重的鉛後再將我掟落湖底，以為我實死冇生，但原來我天生心臟位置是比正常人歪，監製李添勝說此事有醫學根據，由於插不中要害，死唔去，之後我被漁民救起後，再被送上山找山寨嘅結拜兄弟療傷。
3)趁亂報仇
必文令我幾乎走進鬼門關，我康復後當然要找他報仇。此時太平天國入無錫，但未入關前，清兵已經撤退，市面顯得十分混亂，越亂就越適合我找必文報仇。只可惜，寶琦最後竟然救了必文，她說必文雖然並非自己親生，但畢竟也是她丈夫蔣喬（岳華飾）長子，所以無論如何也要保住他的性命。
4)逃避清兵
太平天國打敗仗後，我怕清兵會秋後算賬，所以與寶琦速速收拾行裝離開無錫，但逃亡時，我與寶琦失散，所以折返原地找寶琦，豈料我不幸染上傳染病，又被清兵發現行蹤，並對我們處處迫害。
一網講盡：網友捧祥仔做視帝
好一句「人生有幾多個十年」，黎耀祥在《巾幗梟雄》飾演的柴九在慶豐年米舖由低做起，單靠眼神已能將打工仔的委屈演活出來，令觀眾產生共鳴。加上祥仔在無綫打滾經年，柴九一角甚有其夫子自道色彩，每當觀眾看到柴九掙扎上位，心裏不自覺為他喝采。網友對祥仔的演技更是有讚冇彈，甚至有人認為他應該捧走視帝寶座。
劇情簡介：家族情仇敵友難辨
《巾幗梟雄》延續《溏心風暴》及《家好月圓》式大堆頭家族恩仇格局，且男女主角均以實力派擔大旗，似曾相識皆因三劇編審均出自張華標手筆，黎耀祥另外兩齣得意之作《楚漢驕雄》及《鐵血保鏢》也是由他操刀。《巾》劇由李添勝監製，故事講述米舖慶豐年的掌舵人蔣喬（岳華飾）死後，由四姨太康寶琦（鄧萃雯飾）成大當家，掀起元配殷鳳儀（謝雪心飾）及二姨太彭嬌（商天娥飾）連場勾心鬥角。康寶琦一心扶持二公子吳卓羲接手家族生意，同時與柴九（黎耀祥飾）之間的關係也時好時壞，發展出一段微妙的感情。
http://hk.apple.nextmedia ... art_id=12736522
