現年41歲嘅謝天華喺無綫新劇《學警狙擊》中嘅一角「Laughing 哥」大受歡迎，不過佢就冇乜心情慶功咯。天華早前因一宗醉酒駕駛案而等候今日判刑，由於當日裁判官話認咗罪嘅天華唔係良好嘅駕駛者，仲話唔排除有判監嘅可能，所以連日嚟謝天華都顯得憂心忡忡，日前仲被拍到相約《學》劇嘅周海媚到觀音廟祈福，似乎對判刑好擔心。
早排謝天華上庭應訊，裁判官話可能判佢坐監，搞到佢成個落晒形。資料圖片
雖然Laughing 哥犯官非，好彩仲有好老婆Tina 鼓勵同支持佢。資料圖片
太太Tina 公開求情
幸好天華身邊嘅太太Tina 喺精神上支持佢，Tina 噚日就開腔為老公求情，佢話天華o依家心情已經平復唔少，並謂：「當然天華都認咗罪，佢當日真係判斷錯咗，係要承受懲罰，但希望個官可以從輕發落，判佢停牌已經係好大懲罰。」噚日下晝5點幾，受官司困擾嘅天華一身黑色衫返回跑馬地寓所，佢全程態度表現友善，任影唔嬲，但對於一切有關官司嘅提問佢就充耳不聞。
宣判前夕回家食飯
噚日馮仁昭就打電話慰問謝天華，佢似乎心情麻麻，佢話：「o依家交晒畀律師處理，我都唔方便講，平常心面對，今晚我會好似平時一樣食飯，會留喺屋企唔出街。」馮仁昭仲收到風話謝天華原定3月中會同苗僑偉、張可頤開拍新劇《老公萬歲》，但o依家因為官司問題，可能令劇集延遲開拍。
謝天華噚日攞住叠劇本返屋企，個樣睇嚟頗憔悴。
from
http://appledaily.atnext. ... art_id=12477998
