現年22歲嘅應屆港姐冠軍張舒雅，被評為hea 爆港姐，搞到無線嬲到雪藏佢，仲考慮唔畀佢為新一屆港姐冠軍加冕。日前張舒雅雖然認低威e-mail 畀無線話「可以考慮準備開始接受」輕巧工作，但結果俾陳志雲寸話「多謝」佢。張舒雅連日來都冇乜動靜，不過噚日下晝近5點，佢諗住去男友屋企，點知波折重重。
《斷正遮面》張舒雅以為用雨傘遮住就冇人認得，但卻俾自己高
身形出賣。
《谷氣返家》密謀出街嘅張舒雅谷氣返屋企，最後要出動電召的士至脫到身。
飛撲出家門
雖然噚日天文台曾發出黃色暴雨警告，但張舒雅著住粉紅色水靴，帶埋雨遮喺九龍塘寓所門外出現，佢一見記者，明顯好驚青，仲急急腳走去對面大廈匿埋，又搵柱同遮遮住自己。張舒雅一度想截的士離開，但截唔到，擾攘咗十幾分鐘，最後谷鬼氣返番屋企。面對記者連珠炮發嘅問題，佢採取封耳封嘴態度，全程扮聽唔到。不過，張舒雅返屋企唔夠一個鐘，原來佢靜雞雞call 定的士喺門口，佢知道的士到咗就即刻飛撲出家門，之後直去補習天王男友趙永康嘅中環曉峰閣寓所，唔怪得佢咁心急啦！
《趕會情人》張舒雅喺黃色暴雨警告下約會補習天王男友趙永康（小圖），認真戀愛大過天。
http://appledaily.atnext. ... art_id=12430237
