被評為「hea 爆」港姐冠軍的張舒雅，被雪藏兼或被取消為新一屆港姐冠軍加冕，但她仍不知悔改。前晚陳志雲表示近日收到張舒雅要求復工的電郵，她擺出高姿態表示「可以考慮準備開始接受」輕巧工作，陳志雲忍不住以一句「多謝」寸她。
現年22歲的應屆港姐冠軍張舒雅，當選後屢次詐病推工作，又以健康問題退選世界小姐及國際中華小姐，觸怒無線把她雪藏，更有指被禁為新一屆冠軍加冕。前晚保良局慈善餐舞會在灣仔舉行，港姐陳倩揚、馬賽和高海寧等按例出席公益活動，張舒雅仍不見蹤影。
「有病假紙就得」
陳志雲被問到張舒雅為何又不見人？他說：「佢一直表示身體不適。」他更明寸張舒雅說：「兩、三日前收到佢email ，佢話自己『可以考慮準備開始接受』輕啲嘅工作量，希望同公司商討，以免有啲工作影響佢再生病，真係多謝佢！我哋會同佢保持聯絡，商討適合佢嘅工作。」至於張舒雅稱病，但經常被發現出外，陳志雲指出自己也明白請假當中的竅門，他說：「以前我做咗咁多年政府工作，申請病假，有病假紙就得，病假期間出去食飯係唔違規。」同場三位港姐齊聲表示不了解張舒雅事件的詳情，但馬賽說：「佢好樂觀，工作認真，公司會有安排。」高海寧也表示：「佢好勤力㗎！」她們表示曾相約張舒雅與得獎港姐一同慶祝情人節，但最終張舒雅都沒有赴約。陳倩揚、馬賽和高海寧昨日又於大埔出席一慈善活動，提到陳倩揚有可能代替張舒雅為今年港姐冠軍加冕，陳倩揚表示暫未收到通知，她說：「我唔想理咁多，做好自己嘅嘢最重要。」對於張舒雅或不能為來屆港姐加冕，前港姐陸詩韻昨日到中環出席活動時說：「可能係傳聞，未必係真。由冠軍加冕呢個方法係一直嘅傳統，應該會繼續咁做，咁榮幸嘅事，應該唔會因為傳聞受影響。我之前做一個旅遊節目，佢同其他幾位港姐一齊做，個個態度都好好。報道話佢去咗玩，我諗出去食吓飯唔算係蒲。」
陳志雲暗寸張舒雅以電郵通知公司，考慮準備接受輕鬆的工作。
（左起）馬賽、陳倩揚和高海寧認為應照傳統，由港姐冠軍加冕。
呂慧儀：要盡責任
葉翠翠（左）和呂慧儀昨日出席活動，呂慧儀希望港姐師妹要有責任心。
此外，呂慧儀在九龍灣出席活動時也說：「公司係為佢著想，佢係代表香港同公司，對佢點都有少少體諒。但係既然選到都要盡番啲責任，要履行港姐嘅職責，希望下屆啲師妹可以有責任感。」採訪：林惠卿、王連連、何慧斯、羅慧敏攝影：林德雄
張舒雅因詐病而得罪無線，或被取消為新一屆港姐冠軍加冕的資格。 資料圖片
from
http://appledaily.atnext. ... art_id=12397402
