甄子丹和汪詩詩03年結婚至今有一仔一女，5歲囡囡濟如（Jasmine ）和歲幾的濟嘉（James ）。別看詩詩年紀輕輕，她說自己是個嚴母。相反外表穩重認真的爸爸甄子丹，經常同仔女玩到癲，激到她扎扎跳，難怪她說自己好像湊緊三個小朋友。記者：林佩婷部份攝影：梁細權
仔女各有罰則
單看樣子，實看不出究竟汪詩詩（Cissy ）有多嚴？她說仔女就連食粒糖都要她批准。「就算有人請，我都要睇情況先俾食，否則完全唔准開。基本禮貌如Say Hello 、Thank You 都一定要有，因為細個嚴，大咗可以放鬆，若一開始放鬆大咗就好難教。」也因此，一旦犯錯一定要罰。「Jasmine 有時較硬頸，咁我就會罰佢企定定望住一個方向唔俾玩。至於James 仍未懂性，你同佢講道理係無用，好似換片時扭嚟扭去，我就會打佢Pat Pat 。」
■Cissy 認為外國大的小朋友容易反叛，故堅決要子女在港生活，學懂重視家庭。
■兩姐弟首次見面，Jasmine 好奇點解細佬成日眯埋眼。
夫婦統一教法
反而爹哋甄子丹成日工作少見仔女，所以難得的相處時間，總會比較縱容他們。Cissy 話老公縱壞仔女，甄子丹則常覺管教進食或看電視等不過小事，毋須過份嚴。「因為兩個教育方向唔同，有時我教緊佢哋，老公就會喺面前幫口，令仔女唔知聽邊個好，有次仲喺仔女面前嘈起上嚟。之後我媽咪就話無論咩事都好，點都唔應該喺仔女面前嘈交，否則小朋友會唔驚父母。」自此，夫婦統一教育方向，若有異議都以太太意見作主。
■子女每年都開生日Party 讓他們跟同齡小孩更多接觸。
■平日跟子女以上海話溝通，爹哋則講英文。
胎教狂睇笑片
■以往超憎戶外活動，現在Cissy 卻常陪子女曬太陽，還常到數碼港草地野餐。
不過Cissy 話囡囡一向勁乖好少罰，同細佬James 的小霸王完全兩樣。追溯起來，可能從當初陀BB 時已見端倪。「陀家姐過陣，聽媽咪話多睇笑片、多睇靚嘢，個人開心自然BB 都開心。我嗜甜又最愛煲《家有喜事》，可能因為咁，家姐好Sweet 好鍾意笑，試過帶埋佢同老公食3個鐘燭光晚餐，都唔嘈唔郁唔喊。就係因為覺得個女好易湊，先想生多個。點知到陀第二胎勁追《24》，成日睇到好驚險，口味又改變食咖喱……」
兩個夠晒數
■James 成個小霸王，Cissy 說笑之後要送他到軍校。
結果是：「囝囝而家得歲幾都成日周身郁、發脾氣，又似爹哋好醒
，成日喊到拆樓。」回想當初反而是擔心細佬出世會惹來家姐呷醋，Cissy 特意做足準備，「媽咪話我細個好妒忌妹妹，仲講話要殺死妹妹。雖然我而家唔多記得，但為免Jasmine 呷醋，我專買內容有兄弟姐妹嘅故事書、卡通，到我入醫院前一刻就拎定送畀家姐做禮物，當Jasmine 入嚟見我過陣，規定邊個都唔准抱細佬，跟住就話細佬有份禮物送畀姐姐。點知Jasmine 仲好搞笑咁問：『細佬眯埋對眼都識買禮物呀？』之後一路都無見過家姐呷醋，反而係俾James 蝦番轉頭。有時真係好驚帶細佬出街，成個泰山咁大癲大肺。」甄子丹即補充James 肯定是食得咖喱多，所以性格咁辣。難怪問到Cissy 想唔想再生，甄子丹在旁猛叫生，她都堅決話兩個夠晒數。
