魔術鹹豬手肆虐娛圈，弄得滿城腥風血雨，為免越來越多男藝員被拖落水，無線昨日特召見鹹豬手事件爆料人苑瓊丹（苑仔）親自收拾殘局，而苑仔昨透露鹹豬手並非活躍娛圈的男藝員，為一眾無辜小生討清白。另外，蔡子健昨日也被無線藝員部召見，問他與樂易玲傾談內容時，他只說：「了解吓。」
苑瓊丹早前在電台節目中大爆一男藝員喜以玩魔術氹女，曾先後借故向兩名女藝員抽水摸胸，又指該名魔術鹹豬手外形靚仔斯文，身材比黃宗澤高、愛烹飪、擅玩魔術、拍過不少旅遊特輯及曾與一名女藝人秘密拍拖。苑仔爆料後引起軒然大波，除郭羨妮、陳芷菁、陳敏之和楊思琦等女藝員被傳曾遭該名鹹豬手博懵外，就連不少高大威猛的男藝員也一一被拖落水，成為鹹豬手嫌疑犯。由於被牽涉藝員越來越多，無線高層為免事件變得一發不可收拾，昨日即召見苑仔「照肺」，一方面向她了解鹹豬手事件，另方面則要她親自收拾殘局，在昨晚《東張西望》中為一眾無辜被拖落水的男藝員討回清白。
無線藝員部揸弗人樂易玲關注鹹豬手風波，希望透過不同途徑了解真相。資料圖片
苑仔昨日再爆魔術鹹豬手是一位不再活躍的藝員。
收拾殘局苑仔：好多諗錯晒
陳豪無辜被捲入是次風波。
被無線製作資源部總監樂易玲召見的苑仔，昨午現身將軍澳電視廣播城，對於鹹豬手身份，以及她是否親眼目睹鹹豬手抽水經過，苑仔堅拒透露，只說：「好多hints （提示）未必係真，對號入座未必對得到，好多諗錯晒。其實我當日冇講係TVB 男藝人，只係一個男藝人，但我會幫佢幫到盡，只可以話佢唔係活躍嘅藝員。」苑仔續說：「我之所以喺節目度講，只不過係覺得社會有好多唔開心嘅氣氛，為快樂增值，亦希望畀啲做過呢類事嘅人一個警惕，如果咁做會好清晰地穿煲。」問與樂易玲的會面情況，苑仔坦言在情在理公司都要了解這件事，談到公司是否想揪出真兇時，她說：「咁又冇傾呢件事，佢都冇問到個答案，淨係問我件事係乜嘢情況下發生，我覺得公司都係了解吓。」事情曝光後，有不少男藝人都被拖落水成嫌疑犯，苑仔笑說：「我只可以話佢哋衰在靚仔、高大威猛同出名，不過都唔係壞事，起碼佢哋都清晰畀人知道市場價值有幾高，但係我都要同佢哋講sorry ，下次見到我唔使調頭走。我唔會講呢件事嘅來源，成件事係冇答案，亦唔係要害人同搵人祭旗，只係娛樂料。其實過日喺節目講呢件事，已經有好多聽眾fax 咗唔少男藝人嘅名，咁岩講完之後播咗黃宗澤首歌，即刻有唔少人以為係佢，所以我覺得有必要澄清呢個人唔係黃宗澤。我都知有周刊話陳豪有份，但都係永遠得唔到陳豪，先至會話佢係鹹豬手，因為吃不到的葡萄是酸的。」除苑仔外，蔡子健昨日也被無線藝員部高層召見，他於晚上7時半由經理人陪同離開時頭耷耷，但全程保持笑容。記者問他是否甚麼也不願透露時，蔡子健點頭示意是，問是否被藝員部召見，他未有回答，繼而問他與樂易玲見面傾談甚麼，他說：「了解吓。」至於有沒有其他藝人被召見，蔡子健攤開雙手擰擰頭示意不知道，問有甚麼要回應，蔡子健說：「噚日已經講晒。」說罷便與經理人離開。
殃及無辜馬德鐘唔識魔術
馬德鐘不擔心被今次事件影響形象，相信大家都了解他的為人。
記者昨日致電樂易玲，她承認藝員部召見蔡子健，至於召見原因，她說：「佢收工返公司，佢好關注事件，想了解多啲啫。其實今日佢主要係同藝員部經理李小姐見面，但我都有見過佢嘅。」樂易玲又表示昨日與苑仔見面了解事件，她說：「苑仔話過個人已經唔活躍，而我亦同郭羨妮、陳敏之佢哋了解過，佢哋亦否認俾人鹹豬手，既然係咁，成件事只係娛樂新聞一則，都應該告一段落。」據悉，由於未有女藝員肯站出來指證，無線也束手無策，僅能向相關人士告誡一番，提醒對方日後要注意及檢討待人態度。對於無線出現鹹豬手，馬德鐘昨日澄清：「我只係符合其中一個高度條件，我唔識玩魔術，之前係無線安排我同張雨綺公開示範過一次。」陳豪昨日接受電話訪問說：「而家係要阻止呢件事再發生，而唔係去估邊個做，因為已經有人受到傷害，只係唔希望再有呢啲事發生，受害人要勇敢企出嚟講，阻止歪風，要團結撲滅罪行。」採訪：何慧斯、楊潔雯攝影：陳俊強
蔡子健昨被藝員部高層召見，離開時仍保持笑容。
http://appledaily.atnext. ... art_id=12162181
