甄澤權Louis杯麵魔術被轟抄橋

魔法王甄澤權（Louis）在街頭表演杯麵魔術，被網友拍片直擊穿崩斷正，有港版大衞高柏飛之稱的Louis成為眾矢之的，昨本報連環收到讀者爆料，澳門魔術師劉寶明指控Louis涉偷杯麵橋，怒插Louis的做法令人憤怒；有網友去年已直擊Louis表演街頭魔術搵人做媒，甚至有網友踢爆他在美國Abbott Magic比賽獲冠軍，其實小朋友和老人家都可參加，並非職業魔術師比賽。

現年32歲的魔術師甄澤權憑無線節目《街頭魔法王》成功上位，成為受歡迎的魔術師並於拉斯維加斯、香港巡迴表演。不過，日前他在節目變杯麵不慎被網友直擊穿崩，慘變網民嘲笑對象，昨本報更收到多位讀者爆料，澳門魔術師劉寶明更聲稱是杯麵魔術的原創表演者，於2011年在台灣TMA魔術大會已公開表演，狂轟Louis有抄橋之嫌。

【原創片段】

魔術師劉寶明聲稱是杯麵魔術的原創者，自己於2011年在台灣的魔術大會已公開表演，怒插Louis抄橋。

【魔術穿崩】

Louis在便利店表演街頭魔術，不慎被網友直擊穿崩拍片（右圖）放上網。

行家：條橋劉謙幫我諗

兩個魔術都是將杯麵由冇變有，構思相似，劉寶明昨在電話勁插Louis：「呢條橋係劉謙幫我諗，佢想用番都問過我，當年Louis去台灣參加魔術活動，佢有顧問喺後台做工作人員，有可能睇咗呢個比賽。」劉寶明投訴Louis偷橋變杯麵，他說：「我有問佢點解，佢話咁啱得咁蹺。魔術界百分之九十九相似係好差行為，抄橋會俾人唾罵，令人憤怒。」

Louis於2010年在美國Abbott Magic比賽獲冠軍，劉寶明不屑說：「呢個比賽有兩個運作形式，一個係主辦覺得好掂畀獎，如劉謙、大衞高柏飛都攞過，另一種係畀10萬蚊港紙可以買到。」有讀者亦爆Louis參加的這個比賽，其實是美國Colon小鎮搞的魔術節，老人家和小朋友都可參加，2009及2011年的冠軍都是小朋友，踢爆Louis吹到自己超勁的大話；還指Louis曾參加香港魔術家協會的舞台公開大賽，結果卻名落孫山。

昨本報向魔術家協會會長Albert求證，他承認：「09年Louis參加過我哋協會比賽但攞唔到獎，而美國嗰個只係一般比賽，唔係國際性，呢個比賽有兩個獎項，一係由評審覺得你掂頒獎，另一類係Louis參加嘅上台表演。」除了杯麵被踢爆穿崩外，亦有網友早於去年節目錄影第一輯時，已於街頭拍到Louis變魔術搵人做媒兼失手，當時工作人員叫停指有穿崩位，更叫做媒的人要投入些。

本報連續兩日到位於元朗的工作室追訪Louis，對於被劉寶明投訴偷橋，Louis解釋：「我唔係好熟佢，我冇睇過佢啲魔術，絕對冇可能。」問杯麵魔術是否他原創？Louis說：「係，但有時其他魔術師做過呢，咁一定會有，因為我哋可以買番嚟做，會去改良。」

至於被指在美國參加的魔術比賽有誇大之嫌，他說：「呢個比賽係一個踏腳石，好多出名魔術師都參加過，如大衞高柏飛、Lance Burton，唔係一個冇人識嘅比賽。」有質疑他的魔術是用鏡頭呃人，小朋友都做到，他說：「其實用鏡頭就位，魔術有時好多位可以睇到，所以安排觀眾邊個角度睇魔術，係魔術師嘅技巧。」至於有網友影到做媒，他說：「拍時一定會試機位先，覺得做得唔係咁好，我哋再嚟多次拍番好少少。」

Louis於2010年獲美國Abbott Magic冠軍，但有網友爆該比賽並非職業魔術師比賽，小朋友亦曾攞過冠軍。

Louis曾揚威歐洲及美國，先後獲得多個獎項。

Louis：好唔開心

對於杯麵魔術被踢爆穿崩位，他說：「好唔開心，呢個唔係正常睇魔術角度影嘅片，當然唔可以完全怪曬人哋，自己都疏忽冇留意到。」問之後表演會否硬性清場或落黑布？他說：「如果街頭表演咁樣清場更加冇咗意思，我哋會多啲注意呢啲位置，同埋設計上再做好啲。自己對團隊有啲抱歉，一分鐘魔術可能用咗十幾日研究。」

採訪、攝影：徐錦池、畢紹基、黃曉程

【前晚】

Louis前晚在工作室外受訪，坦言對杯麵魔術被踢爆感到唔開心。

有網友去年已拍到Louis在街頭變魔術要搵人做媒。互聯網圖片
【網友熱話】秋生：只好話道行未夠

Louis的杯麵魔術「施法」過程被踢爆，當事人跟同為主持的阿Bob已分別作出回應，至於網友們就有咁嘅反應。

反：【黃秋生】

魔術俾人踢爆，預咗㗎啦。踢爆嘅人亦冇所謂道唔道德，只係扼殺咗其他人嘅快樂。魔術師只好話自己道行未夠。（一般人冇必要守魔術師守則）

反：【Lau Joe】

直接原因是冇自知之明，唔夠班做街頭表演魔術，只適宜做鏡頭下表演，有問題可剪輯。

反：【Moonkee Yip】

高強嘅魔術師，唔會畀大家睇到穿崩，但呢個《至尊街頭魔法王》喺街嘅人會睇到穿崩，實在離奇。

撐：【Angus Chan】

公平啲講，個魔術如果喺後面睇都會穿啦，只係工作人員疏忽啫，咁又點算得真係穿崩呢。

撐：【Suk Wa】

識法何必破法？娛樂嚟啫，你估真係有超能力咩。

撐：【Vincent Ng】

人哋花咁多心機去做魔術，你哋使乜咁認真，人哋都係畀免費娛樂大家啫，係人都知魔術係假，明知假你都要走去識穿人，畀個魔術識穿大獎你好唔好，超無聊。
from:http://hk.apple.nextmedia.com/entertainment/art/20150413/19110105

現年32歲的甄澤權（Louis），2004年於浸會大學國際學院畢業，主修市場推廣及傳訊。於大學時期對魔術產生興趣，靠書本及影碟來自學魔術，大學畢業後開始其魔術事業。2010年Louis分別於匈牙利Joker Magic國際魔術大賽，及美國Abbott Magic國際公開魔術大賽中，以白鴿魔術贏得冠軍（圖），因而為港人所認識，並冠以港版大衞高柏飛的美譽。

過去的表演內，Louis曾成功預測香港恆生指數收市點及六合彩攪珠結果，而前年他於商場表演「極速水中解鎖逃脫」，以25秒75成功掙脫身上的束縛衣及鐵鏈，逃出水牢，並打入健力士世界紀錄。
from:http://hk.apple.nextmedia ... 150413/19110115

Bob（右）連日在網上力撐Louis，並稱不知當日魔術底蘊，反惹更多人抨擊。微博圖片
魔術師Louis的「杯麵魔法」被網民在街外影到穿崩，繼而被網友鬧爆不專業。不過拍檔林盛斌（Bob）連日在網上力撐，反斥拍攝者行為「缺德」。Bob昨在facebook再列舉反擊「相信冇人會認為David Copperfield（大衞高柏飛）真係變走咗自由神像，Criss Angel（安杰爾）真係將啲人分開一半」，並稱不知底蘊：「對於嗰段唔知邊個拍同唔知點解要拍嘅片段，我想講我都係睇到條片先知原來個魔術係咁變！」他認為每個魔術都是一個精心創作，相信所有幕後團隊都會盡力保守每一個魔術秘密。

曾經跟Louis學玩魔術的李綺雯亦在fb說：「希望不會有天觀眾看到跳樓戲的幕後製作，質疑演員不是真跳樓。一個魔術師和他的團隊，能夠完成十集的街頭魔術，四五十個街頭魔術，絕不簡單，何不用欣賞的心情去享受呢。」

撰文：嵐山
from:http://hk.apple.nextmedia ... 150413/19110108

電視圖片
節目《至尊街頭魔法王》，除魔術師Louis的杯麵魔術引起網友熱烈討論外，節目主持吳若希的高八度聲線亦被網友怒轟。由於吳若希每次欣賞Louis變魔術時，均會極誇張地擘大口再飆高音說「好犀利呀」、「點解嘅」，已令觀眾感到煩厭，日前播出最後一集中，吳若希更加大力度，以娃娃聲狂說「好打耳（好得意）」。

吳若希曾解釋因詞窮才會每集反應一樣，又於網上道歉，有網友更發揮創意，將吳若希的「點解嘅」、「好犀利呀」反應，剪輯成1分24秒的remix版無限loop，當事人吳若希亦有大方轉載，並留言稱被自己的「點解嘅」笑死。

撰文：郭堡
from:http://hk.apple.nextmedia ... 150413/19110111

魔術師甄澤權（Louis）噚日以關注私隱運動大使身份喺銅鑼灣表演街頭魔術，仲點名話想同鍾嘉欣合作，希望有機會試吓拍劇。

講開私隱，佢之前喺節目表演嘅杯麵魔術俾人影到穿崩，呢件事會唔會令佢覺得私隱真係好緊要呢？佢話：「都係，呢件事都有警惕，深深體會到要好好保護，𠵱家做街頭魔術表演會好小心，壓力亦大咗。」

撰文：馮仁昭

馮仁昭
from:http://hk.apple.nextmedia ... 150505/19135566