早前有傳33C 上圍的郭羨妮遭「魔術手」毒手，但據知郭羨妮已向無線高層樂易玲否認有其事。
無線又有女藝員遭人抽水，不過今次鹹豬手變咗「魔術手」。事緣去年11 月苑瓊丹喺港台節目中大爆一名無線男藝人借玩魔術為名，胸襲電視台姐仔；又在拍旅遊節目時，扮有風度扶住著三點式嘅女拍檔落水，卻突然跣手托住女拍檔胸底。
近日傳媒跟進事件，有傳受害人是郭羨妮和陳芷菁，但實際情況卻有出入，加上苑仔詳細描述「魔術手」特徵，導致TVB 全台小生人人自危，黎諾懿更驚食死貓斷送前途而在經理人面前失控嚎哭。苑仔是但噏，據知無線已展開內部調查。揪出真兇係緊要，最怕誤中副車啫。
「魔術手」6 大特徵
a.斯文靚仔
b.識煮幾味
c.經常拍旅遊節目
d.高過黃宗澤（180cm ）
e.曾同女藝人秘密拍拖
f.鍾意玩魔術
誤傳 玩魔術抽郭羨妮
苑瓊丹於香港電台《瘋show 快活人》節目中，向主持梁思浩「揞名」爆無線一名男藝人「魔術手」，借變魔術之名向兩名女藝人抽水，其後即有傳媒指該兩名受害女藝人是郭羨妮和陳芷菁，但據可靠消息指出，郭羨妮於本週一（2 日）已向無線高層樂易玲否認曾遭「魔術手」胸襲，換言之，受害女藝人並不是郭羨妮。
「魔術手」聲稱用紙巾穿過郭羨妮身體，然後突然將紙巾往上拋高，趁機伸手在郭羨妮胸部停留大約1 秒。
39 歲蔡子健有「旅遊王子」美譽，出名是圈中魔術愛好者，現轉職紐約人壽財務策劃，週一於皇室堡下班時對被拖落水感氣憤。最新圖片
99 年鍾麗淇於旅遊節目與蔡子健稔熟，二人被拍下手拖手行街，關係曖昧。
嫌疑小生
蔡子健 激動
冇乜comment ！如果有嘅話，大家都應該有適當嘅行動，應該報警啦係咪呀！如冇實質嘢，我覺得唔需要回應，真係查到先算。而家苑仔係唔係話係我先，佢話係我先答！我都係冇咩特別可以答到你，因為我冇聽過個節目，完全唔知。
37 歲陳豪形象好好先生，入行以來傳得最耐的緋聞只有廖碧兒及早期的郭羨妮。
陳豪唔只鍾意歎咖啡，亦最叻煎牛扒。
陳豪 輕鬆
未聽過有咁嘅事喎，如果TVB 真係有人身受其害梗係要講出嚟，等大家知道！如果係存心非禮更加要報警，唔理係咪同事，遇到呢啲嘢都會鼓勵佢出聲。
最新圖片
吳卓羲 無愧
我梗係冇做啦，就算拍戲要攬住kiss 都唔會掃對方背脊㗎，除非導演特別要求啦。我清者自清，問心無愧，不嬲都好守規矩。當事人要報警啦，否則所有男藝人嘅形象都受損。
29 歲吳卓羲，學歷只有中三，但圈中緋聞女友多多，糾纏最耐的有官恩娜同佘詩曼，女人緣勁旺。
蔡淇俊 玩人
好多謝啲人覺得我高大靚仔喎，聽完得啖笑囉。件事係誤會，如果係真咁做好嚴重喎。我冇拍過旅遊節目，上大陸做兒童節目就有，嗰度又冇泳池。我又唔識玩魔術，身邊高大靚仔嘅，係咪高鈞賢呀？哈哈哈！
24 歲蔡淇俊家人做賣布生意，屬有米一族，04 年開始同陳自瑤傳出緋聞，以拍青春劇為主。
黎諾懿 痛哭
我唔知呢件事喎，我身高都over 一米八嘅，我係識玩魔術，但我冇拍過旅遊節目喎。唔驚有人估，好搞笑囉，都有信心冇人估我嘅。
28 歲黎諾懿出名住家男，同無線前經理人女友拍拖多年，魔術及廚藝了得，特徵似層層，難怪有消息話佢驚被人誤會前途盡毀而痛哭。
苑瓊丹去年11 月3 日喺港台節目《瘋Show 快活人》「娛樂大爆爆」環節中，大爆無線有男藝人先後鹹豬手兩名女藝人，苑仔指該名鹹豬手鍾意玩魔術，更借玩魔術為名，實則非禮女藝人，故稱之為「魔術手」，又扮好人在泳池邊扮扶人而借機抽水。事件迅速喺電視城散播，全台藝員同幕後都議論紛紛，原來大部分都知嫌疑犯係邊個。
女藝人之間更互相提醒，見到嫌疑犯要小心保護自己。
誤傳羨妮
有傳「魔術手」其一受害人是郭羨妮，但據悉郭羨妮週一（2 日）已跟無線製作資源部總監樂易玲主動交代，更堅稱冇受過「魔術手」滋擾，如果苑仔嘅「魔術手」事件冇亂噏，受害人應該另有其人。
而另一受害人陳芷菁被傳拍攝旅遊特輯時在泳池邊遭抽水，本刊發現與真實版本有出入，據知情人士透露：「芷菁根本冇喺個節目入面著過泳衣，點會喺池邊俾人抽水呀，佢係有次行落樓梯，嗰位男藝員就拖住佢隻手扶佢，其間揩到佢胸部，其實當時芷菁都唔肯定佢係咪抽水，所以冇當場鬧佢囉！」
據知自從苑仔於電台爆料後，無線有關方面已展開內部調查，並已勒令丸仔和相關藝員封口，更擬於週二（3 日）召苑仔返電視城了解情況，知情人士說：「苑仔話佢都係聽人講，冇親眼目擊，可能啲人覺得『魔術手』成日溝女唔妥佢，傳吓傳吓咪變咗佢做鹹豬手囉！」
苑仔隨口噏，最慘係佢於電台內講晒「魔術手」六大特徵，網友紛紛開名估，其中被指係嫌疑小生之一嘅黎諾懿更因怕事件影響前途，而擔心到嚎哭，知情人士續說：「最慘係佢咁啱啲特徵都似『魔術手』，佢又唔識答傳媒，乜特徵都認晒，佢咪驚啲傳媒會話佢係『魔術手』，所以佢事後同經理人忍唔住喊話：『冇喇，我今次玩完啦！』我哋知佢為人，都知唔係佢嘅！」
受害人潛水
「魔術手」事件愈傳愈大鑊，牽連甚廣，無線總經理陳志雲於上週五（上月30 日）指藝員科已展開調查：「我暫時未收到（受害人）投訴，如果收到，公司會好嚴肅處理。而家可能係四圍傳吓啫，係誤會定唔小心大家都未知，藝員科已調查緊，如果佢哋未有結果唔會話畀我知㗎！」
兩位女受害人亦不敢多言，郭羨妮冇回覆，而陳芷菁則透過無線公關表示自己「不在香港。」搞到咁大件事，不如「魔術手」自己企出嚟澄清，好過累街坊啊！
扶樓梯抽陳芷菁
苑仔又於節目中稱陳芷菁於泳池邊著泳衣搞到「魔術手」忍唔住向佢出手，但據知真實版本其實係陳芷菁早年同「魔術手」拍攝旅遊特輯時，「魔術手」因為拖佢玉手落樓梯時懷疑手肘撞到佢胸部，當時陳芷菁冇出聲投訴，奇怪是件事隔咗咁多年才有人嗱番出嚟講。
據苑瓊丹表示另一位受害TVB 藝人當時仍未結婚，牽涉其中的陳芷菁03 年與大律師張錦榮結婚後，亦從未表示曾遭男藝人抽水。本刊曾致電她想了解事件，可惜其助手以她不在香港為由，未有回覆。
陳志雲：公司調查緊，會好嚴肅處理！
樂易玲：一定會跟進。
無線總經理陳志雲透露，藝員科已留意事件，會作內部調查。而無線製作資源部總監樂易玲自農曆年度假返港後，週一亦迅即聯絡鹹豬手事件多位當事人，樂小姐說：「我哋一定會跟進、了解件事，會搵當事人了解吓，如果係事實，公司一定會處理。」
豬手無處不在
電視城「魔術手」未落網，人心惶惶，不過電視城以外一樣唔少女星中過招，其中戴夢夢同趙碩之亦同樣中招，而戴夢夢更親身向本刊示範鹹豬手點陰濕，狂徒周街都係！
戴夢夢：扮嗌你摸胸
呢招好陰濕，隻手放喺人哋個胸側邊扮嗌你，其實乘機摸你個胸，博懵就真！
戴夢夢拉住趙碩之手臂不斷搖，同時用手背猛撞趙碩之左邊胸底，示範色狼陰招。
趙碩之：全身俾人摸
我喺台灣拍《赤壁》嗰陣件衫好窄，我哋又冇女助手，得班男人同我整理件衫，全身都俾人摸過晒！
趙碩之在台灣拍《赤壁》遊戲廣告，疑穿上性感cosplay 服時，被現場男職員借幫手穿衣為名摸勻全身，鹹豬手原來四處係，各位姊妹真係要小心。
電視城走廊狹窄，湯盈盈就話有「餓狼」扮迫狹撞人pat pat ，各位女藝人真係要小心。
「我有聽過其他女藝人講，有人成日喺走廊迫迫吓咁撞女藝人pat pat 囉，都知佢係邊個，自己都會留意佢同小心啲囉！」
湯盈盈爆多單
週日（1 日），本刊問湯盈盈有冇聽過電視城發生「魔術手」非禮事件，湯盈盈就自稱未聽過，不過佢就爆多單有男藝人專摸女藝員屁股抽水，問到該男星係咪5 位嫌疑犯之一時，盈盈就好大反應話：「吓？唔係佢，哈哈！」
女藝人齊估豬手
除咗湯盈盈再爆有TVB 小生嗜摸花旦屁股外，原來無線好多女藝人都議論紛紛邊個係真兇，不過都係估估吓。
胡杏兒：叫佢報警
唔知喎！我冇睇過變魔術，有就叫佢報警啦！
鍾麗淇：撞到pat pat
好恐怖喎！自己唔係呢個圈都唔想講太多呢啲！不過自己新入行嗰陣都有發生過！真係好深刻印象就係一次撞到pat pat ，邊個就唔好講，佢都有即刻同我道歉！其實拍戲有時好難免，知道佢係有心都會feel 到！
譚小環：會喝止佢
冇試過呢啲事！如果係有咁嘅會喝止佢，做女仔要say no ！我都想知邊個係「魔術手」！
胡定欣：我唔夠魅力
都聽過好多人傳過係邊個，佢係好斯文、好照顧partner 、好風度，不過佢冇表演過魔術畀我睇，可能我唔夠魅力啦！
楊思琦：唔係黎諾懿
子健表演過變估銀仔畀我睇，佢係對魔術好雀躍，其他仲有表演過魔術就有黎諾懿！不過唔會係佢（黎諾懿）啦！
火滾鬧
現於紐約人壽擔任財務策劃師的蔡子健週一（2 日）忍唔住當街扯火鬧：「而家苑仔係唔係話係我先，佢話係我先答！」他又稱將會於下月返無線拍劇集《廉政行動2009 》，暫時未影響工作。
網友尋真兇
自上週爆出「魔術手」事件，網友熱烈討論，單是香港討論區，短短一星期已有多達三百多個留言，紛紛討論誰是「魔術手」，人人有意見，邊個係真正「魔術手」，大家自己睇。
