四葉女龔嘉欣一向多是非，之前已傳同另一位四葉女趙碩之不和互放暗箭，今次又涉嫌勾引有婦之夫周國賢，佢真係要檢討吓。
唔係每個男人都好似賤震咁偷食，我FBI 收到單料，有咩絕種好男人，就算有女送上門，佢都堅持唔食㗎！講緊嘅就係海味鋪太子爺又靚仔兼有妻兒嘅潮爸歌手周國賢囉！話說早排佢同Juno 去日本拍《日本東北咁過祭》，同行亦有兩個四葉女龔嘉欣同王淑玲喎，聽講王淑玲對Juno 好嗒糖，不過始終女仔怕怕醜冇採取主動，但佢位姊妹就勁喇！
《咁過祭》兩pair 人，王淑玲（右一）嗒糖Juno ，龔嘉欣就冧周國賢，但姣唔掂。
龔嘉欣唔只一次跟周國賢齊齊現身《咁過祭》，點解佢仲要話冇同周一齊拍攝過？唔通係電腦特技？
有一晚龔嘉欣竟然膽粗粗漏夜去周國賢間酒店房拍門。
三更半夜拍人房門，斷估唔係借豉油掛？周國賢韓籍老婆唔響度，又冇人知，咁大誘惑，但人夫不為所動喎，閂埋門仲即刻打電話去個節目統籌度備案，之後一返到香港，周國賢更即時同經理人申報！FBI 聽聞龔嘉欣俾無線高層警告以後唔好亂去人地房。
FBI 好奇問龔嘉欣做乜上人房？佢驚青回應：「吓？邊個講㗎？我哋冇一齊拍過嘢……做完嘢都好攰，邊有時間同佢哋玩呀？」之不過FBI 睇番《咁過祭》見到其中有集龔嘉欣同周國賢一齊嘅畫面，點解要話冇呢？
