寒流襲港日子雖然短之又短，但一碗熱辣辣的靚湯在手，冬季即時顯得特別和暖溫馨。無時間自製溫馨，去到成行成市的外賣即食湯連鎖店，或者出品自家即食湯的快餐店，都可飲到靚湯。專家教路，冬季宜選溫補、滋潤而不燥的羊肉、牛肉、烏雞、花膠、海參或者蔬果湯，而有特別體質的人士，例如慢性病患者，揀湯前要知宜忌，先可以從幾十款中西湯之中，選出啱飲靚湯。
資深公關Janet 自從自立門戶後，每日起碼工作十二小時，連晚飯時間都在公司搏殺，想飲至愛的老火湯，就要等待週末返媽咪家，或者買包即食湯過口癮。「女人無湯水，就會好dry ，搽幾多護膚品都無用。我經常捱夜，所以成日燥熱生痱滋，多飲湯就會有改善。」一有媽咪愛心湯，她就會飲一大湯碗，還嫌未夠喉，帶多一壺返公司。
Janet 是多坐少動的OL ，腸胃愈來愈差，若有充足湯水，會對腸胃有好大幫助。
無湯不歡
Janet對湯水種類毫不揀擇，青紅蘿蔔、粉葛赤小豆及節瓜鹹蛋是她三大至愛。無暇探媽咪，她會買健康工房即食湯，貪選擇多、地點就腳兼味道不錯；想再慳時間，她索性午飯時食湯飯，或者飲例湯，補水至上。「仲打算買個真空煲放在公司茶水間，到時日日都有老火靚湯飲。」果然是同事眼中的「湯精」。
中湯智慧
中式老火湯平均須煲一小時以上，柏林醫務中心註冊中醫師許懿清指出，就算性質寒涼的材料，煲得耐都會變為滋補，「例如雪梨，煲完湯後寒性會轉為清潤滋補，所以冬天乾燥寒冷，更適合飲老火湯，滋養五臟六腑。」
不過，由於蔬果內的維他命C 及葉酸，遇熱會被破壞，所以確進糖尿專科中心高級註冊營養師林思為指出，以蔬果煲的中式老火湯不能代替蔬果，至於以肉和骨煲的湯水，亦最好連渣食，「就算煲幾個鐘，亦只有小量蛋白質和鈣質分解入湯，食埋渣會吸收到更多營養。」她指出，滾湯反而是更佳選擇，「番茄豆腐魚尾、節瓜肉片等等，加熱時間短，保留到更多維他命C ，而且會連渣食，更有益。」
營養師林思為認為即食湯用料足，好過味精例湯。
西湯智慧
冬季最緊要驅走寒意，中醫師許懿清認為：「加入香料或者辛辣的西式湯，能驅寒及行氣活血，適合經常手腳冰冷或者怕凍人士。」至於以蔬菜為主的西湯，例如番茄湯，將番茄攪碎，飲湯之餘可全面吸收豐富纖維，而且含抗氧化的茄紅素，最適合女士護膚。至於加入忌廉、鮮奶的湯類，脾胃虛弱、消化力差人士則少飲為妙。
營養師林思為提醒，西湯之中，有幾類比較高脂，不能多飲：「忌廉湯、牛尾湯，脂肪一定比清湯高；而洋
湯看似清湯，原來須先以牛油爆香洋
，所以亦屬高脂。」她提醒，不少西湯都會將豆或蘿蔔打爛，製成濃湯，所以澱粉質含量較中湯高，糖尿病人若要飲西湯，就要減少進食澱粉質。
即食速配
冬天濕度日日低過五十，飲湯特別覺得滋潤；無時間煲，可以選購慳工夫即食湯。不過款式多不易揀，尤其慢性病患者，最好參考專家建議揀好湯。
痛風忌菇
菇菌、豆、海產均含高普林（Purine ），而且屬水溶性，會溶入湯中，吸收後會轉化成尿酸，引致痛風發作。脂肪亦會抑制尿酸排洩，忌飲肥膩骨湯。
速配推介 滾湯時間較短，較少普林溶於湯中，宜只飲湯不吃渣；或者只用瘦肉、蔬菜煲的低脂老火清湯。
無花果雪梨南北杏煲豬
/ 原味家作HK$42 （625 毫升）
味道評級：雪梨發揮滋潤功效，配合無花果，可化痰潤肺，最適合冬季。湯有淡淡的雪梨味，湯味清淡得似自家煲製。
糖尿忌豆
豆、薯仔、蘿蔔、粟米、粉葛、淮山、茨實等含豐富澱粉質，易令血糖飆升；生果湯含高糖分，不宜；以動物內臟、骨煲製含高脂高膽，亦不宜。應少食湯渣，否則要相應減少飯量。
速配推介 清淡的海鮮、瓜菜、菇菌湯；中醫認為鮑魚可穩定血糖，可常飲。
西班牙海鮮湯：Soup Sense HK$48 （500 毫升）
味道評級：只見魷魚和蝦，魚肉可能已溶入湯中，脂肪比例約佔熱量兩成，味道比想像中淡；海鮮含碘質，平衡身體所需荷爾蒙，協調新陳代謝及脂肪燃燒。
高膽忌骨
豬骨、牛尾、連皮雞或者雞腳均會於湯水中釋出脂肪，飲後提升膽固醇；椰子九成的熱量來自飽和脂肪，勁過豬油，切忌。
速配推介 蔬菜及豆類高纖、菇菌亦含水溶性纖維，均有助降膽固醇，煲到溶或連渣食更有益。
牛肝菌栗子蓮藕湯：健康工房HK$32 （438 毫升）
味道評級：採用牛肝菌、雪耳、冬菇多種菌類，有豐富水溶性纖維，能降低膽固醇。飲落似清補涼，卻不覺有栗子及蓮藕味道。
資料提供：註冊中醫師許懿清、註冊營養師林思為
查詢：
原味家作2311 2987
Soup Sense 2548 0362
健康工房2408 0333
脾胃差、消化力弱的話，中醫師許懿清建議常飲滋潤又清淡的湯水，較易吸收營養。
即食湯切勿連包裝加熱，先倒入湯碗內較安全。
飲湯代餐
無論中醫抑或營養師都認為，湯料的營養仍有大部分保留於湯渣內，所以有湯渣，就不應放過，如果湯料營養夠均衡，甚至可以當一餐。即食湯之中，若要選一款「代餐」，營養師林思為推薦韓式人參雞湯。
「韓式人參雞材料豐富，有雞、人參、糯米、栗子、紅棗，雞肉提供蛋白質，而米、栗子和棗均提供膳食纖維及碳水化合物，只要按營養標籤揀選鹽分不太高的類別，毋須另加飯菜，都可以成為均衡的一餐。」栗子的纖維含量與豆不遑多讓，每28 克就有3.3 克纖維。不過，不同品牌的人參雞，熱量和鹽分會有差異，如果食一包已超出一餐限量，應與別人分享，再加一碟菜補充纖維，以及半碗飯填肚。
中醫師許懿清認為韓式人參雞選用新鮮人參，並非中醫入藥的六年乾參，雖然補效較低，卻補而不燥，加上糯米亦有補虛作用，適合冬天食用。
除人參雞外，林思為亦推介高纖的中式清補涼湯，或者西式湯做「代餐」。「清補涼的淮山、茨實、薏米、蓮子、百合，提供的纖維比白飯更多；選擇有通粉、字母粉的西湯較飽肚，加上海鮮、肉類或蔬菜配料，就夠均衡。」
高血壓忌鹽
經過加工醃製的金華火腿、鴨腎，是老火湯的常用材料，但含大量鹽分，是大忌。即食罐頭湯通常含較多鹽分，最好少飲，或者每次只飲半罐，甚至四分一罐。
速配推介 中醫指出，鮑魚可降血壓，不妨選飲用鮑魚炮製的中式湯。至於西式湯，應按營養標籤選擇鹽分較低的湯類。
靈芝姬松茸鮑魚燉竹絲雞：燕之家HK$59 （450 毫升）
味道評級：鮑魚降血壓，姬松茸含水溶性纖維，疏通血管，亦有助降壓。有螺片及原隻鮑魚仔，味夠濃，類似用料十足的家庭靚湯。
長者忌花膠
老人家通常脾胃較弱，所以消化力比較差，因此花膠、魚翅等難消化的湯料，最好少食為妙。
速配推介 針對老人家體質較差的特點，應選補身但比人參溫和的太子參、冬蟲草、靈芝等湯料；行氣活血的當歸，亦適合冬天保暖。
當歸生薑燉羊肉：鴻福堂HK$55 （400 毫升）
味道評級：當歸行氣活血、生薑驅寒、羊肉溫補，適合長者於冬日暖身。當歸及羊肉味濃，頗油膩。
女士忌當歸
如果健康狀況正常，並無特別避忌，不過如果正值月事期間，就要忌食含活血化瘀藥材的中式湯，例如當歸、田七，避免分量拿捏不準，令失血量過多。
速配推介 含有豐富骨膠原的花膠及鳳爪、滋陰養顏的海參、增強體質補精力的冬蟲草，均特別適合需要護膚美顏、容易疲倦的女士。
木瓜花生眉豆鳳爪煲豬尾骨：美心HK$36 （460 毫升）
味道評級：鳳爪及豬尾骨的脂肪與骨膠原，都是女士護膚養顏所需。蜜棗味夠甜，但飲不出木瓜味，湯水不算肥膩。
資料提供：註冊中醫師許懿清、註冊營養師林思為
查詢：
燕之家2633 1299
美心2101 1333
鴻福堂2920 2206
代餐要均衡
以湯代餐，不應超出每日吸收上限，否則一樣會致肥，甚至導致慢性病。
熱量：（男士）1800 至2000kcal
（女士）1200 至1500kcal
脂肪：60 克以下/ 12 茶匙
鹽分：2400 毫克以下
纖維：（成人）18 至30 克/ （兒童）年齡+5 克
即食湯店隨處可見，冬天飲個湯暖身，有益過高糖高脂的奶茶咖啡。
湯水補典
適飲時段有滋補功效的湯水，最好早上空肚飲，最易吸收，食埋渣可當早餐；餐與餐之間當小食亦可，但最忌飯後飲，水分稀釋胃酸，減低消化力。
每日一款 就算有幾愛飲湯，都要避免一日之內飲幾款，以免功效相沖或互相抵銷，例如人參加蘿蔔，就會抵銷人參補益。
小心藥材 肝病患者要小心草藥湯料，宜避免飲用或先諮詢醫生意見，慎防影響病情。
慎防高鹽罐頭湯及即食湯味道雖然不覺鹹，但鹽分一般不低，腎病患者應避免飲；根據本刊06 年即食湯化驗結果，最高鹽樣本佔全日吸收限量42%，所以即食湯不宜日日飲。
安全加熱一早買定即食湯，下午以微波爐翻熱，由於時間短，對營養破壞最少，但建議應先倒入適用於微波爐的器皿內才加熱，以防包裝釋出有毒物質。
資料提供：註冊中醫師許懿清、註冊營養師林思為
醒你
中醫提醒感冒患者要停飲老火湯，否則會連體內的風寒病邪都一併滋補，更難痊癒。
湯並非單純水分，含有多種物質，一碗湯只等於半碗清水，所以飲完湯一樣要飲水。
