何韻詩一向搞作多多，佢名下嘅慈善基金噚日喺尖沙嘴舉行「The Ten Days Of Christmas 」慈善展覽，又推出一系列產品義賣，展覽會舉行至下月4號。阿詩噚日出席展覽會揭幕時，好風騷咁滿場飛，除咗佢嘅父母外，一班好友包括楊千嬅、王菀之、劉浩龍同余文樂等都有撐場。阿詩話請晒所有朋友，但點解唔見容祖兒？阿詩就話唔知喎，但就爆祖兒應承咗若果毛公仔賣唔晒會包底，點知過氣緋聞男友劉浩龍又講埋同一番話，話阿詩破唔到紀錄，佢又會包底，搞到兩個人好似爭住「包」阿詩咁。
何韻詩慈善基金搞活動，又點少得佢父母呢。
楊千嬅見到現場啲菇形公仔，表現得好有興趣，講到手舞足蹈。
王菀之浸溫泉遮面
不過阿詩對產品充滿信心，雖然個展覽花咗50萬，但佢嘅籌款目標唔止要回本咁簡單，希望可以賺到一倍。佢又話諗住畀人暗投佢好鍾意嘅其中一隻「小紅菇」，咦，唔知祖兒同劉浩龍會唔會爭崩頭呢？王菀之就話完成東亞騷後，會去浸溫泉度假，原來呢次係佢發育後第一次裸浸，問佢有冇做乜嘢準備？佢話：「我本身OK ，我好適合浸溫泉同裸露！」之後佢補飛話：「不過我好怕醜，所以會用毛巾遮一遮，但基於遮唔到上下，我會選擇遮住個樣。」
劉浩龍同容祖兒（小圖）都話幫阿詩嘅慈善義賣包底，認真唔話得。
