唔係要一竹篙打沉一船人，但娛樂圈中可以以「潛規則」上位（你懂的）嘅傳聞的確不時都聽到。「規則」係存在，但係咪要陪老細食飯出遊甚至過夜……係個人選擇。
好似喺大台做足16年綠葉、現年38歲嘅伍慧珊咁，多年嚟好多時都係喺古裝劇中演「妹仔」，但昨日有周刊報道，話佢入行21年嚟，的確有「中間人」向佢「問價」，或者係暗示不道德交易，去換取工作機會，不過，「有料」嘅伍慧珊就話自己守身如玉，點都唔會走上呢條「捷徑」，仲話自己應付呢種問價題目應到煩，更諗到「絕世好橋」——求其講個天價去回應，人哋就唔會揀中佢。
伍慧珊喺周刊訪問中，亦坦承其實好多「中間人」都係佢身邊嘅人，但好好彩冇人強迫佢，佢又話喺飯局中會被人問三圍同戴bra嘅cup數咁。
伍慧珊雖然唔出名，但個樣點都熟口熟面，佢喺4年前決心離開大台，過檔港視拍過《警界線》等劇，曝光率同知名度高咗，令佢可以返內地登台搵真銀，而佢上個月更因為喺新片《幼兒怨》嘅開鏡中，以一襲透視裙嘅打扮，成功以36D搶走「露慣露熟」嘅36G崔碧珈焦點。
from:
http://hk.apple.nextmedia ... 160817/19739838
