無線前晚喺將軍澳電視廣播城錄影《獎門人200集超級派對》，請咗好多嘉賓嚟玩，包括同錢嘉樂傳緊緋聞嘅湯盈盈、梁靖琪（Toby ）、姚樂怡同王祖藍等。湯盈盈成為全晚焦點，獎門人曾志偉一見盈盈出場就大叫家嫂，不過錢嘉樂為保盈盈，分散注意力狂數姚樂怡賣大包，Toby 賣大米，笑佢經常抬住兩包米。不過無論點，盈盈樂樂都走唔甩要俾人玩，喺徇眾要求下示範玩啜乒乓波，嘉樂仔仲抵死咁對盈盈話：「大家要求唔好有芥蒂，玩完當冇嘢。」洪天明聽到呢句說話，笑到盈盈面都紅。玩嘅時候盈盈樂樂太投入，一個唔該兩個嘴對嘴錫咗啖，現場啲人開心到好似結婚玩新人咁。
姚樂怡同喬寶寶啜乒乓波，咀到嘴都歪。
Toby 拉開外套嘅衣領，露出豐滿上圍。
王祖藍食辣狂嘔
王祖藍因為壽司太辣食到嘔，非常辛苦。
喺估歌仔環節，盈盈好叻咁估中咗，於是同嘉樂仔打情罵俏咁講笑，嘉樂仔即刻指住盈盈話：「唔好咁！」盈盈又好聽話咁唔出聲。啜乒乓波時仲出現「斷背啜」，張繼聰、EO2嘅Otto 同王祖藍都要玩「男男啜」，場面搞笑。王祖藍玩「排排坐」食辣壽司，搞到佢好似海獅咁趴喺地，仲嘔到一地壽司，睇佢嘅表情超級誇張，原來佢真係辣到頂唔順，不過企喺佢身邊嘅人俾佢啲嘔吐物射中，除咗佢之外，吳家樂都頂唔順狂嘔。
錢嘉樂同湯盈盈玩得投入，唔介意嘴對嘴啜乒乓波。
