嚟自不同地區嘅20位候選亞洲小姐，噚日到大埔拍攝《2008亞洲小姐競選總決賽》外景，適逢10號土庫曼佳麗綺蓮娜寶露柔素娃（Iryna Bilousova ）生日，亞視安排兩位身材出眾嘅5號徐妮雅同埋6號袁小曼推生日蛋糕出場，為壽星女慶祝，仲搶去唔少風頭。綺蓮娜因為唔識英文，所以心急到未點蠟燭就想吹熄佢，認真搞笑。
低胸上陣嘅5號徐妮雅（左）同6號袁小曼一齊食蛋糕，養眼度十足。
10號土庫曼佳麗綺蓮娜噚日18歲生日，眾佳麗一齊同佢慶祝，氹到佢好鬼開心。
3顏子菲送關心
3號顏子菲雖然身材唔算突出，不過佢笑得甜美，身材平均，唔難成為黑馬人選。
噚日18歲生日嘅綺蓮娜以簡單英語話生日願望係秘密，至於想唔想得冠軍，她竟然話呢個唔係最大願望。至於波濤洶湧嘅袁小曼就話件衫係公司安排，相信係因為佢著咗紅色裙嘅關係，公司先安排佢同徐妮雅送上生日蛋糕。3號顏子菲就話準備咗禮物畀壽星女，佢話：「我同綺蓮娜都friend ，因為佢唔係好識中文同英文，我以前去加拿大讀書時，都係完全聽唔明，仲成日喊，所以我知道冇朋友嘅感覺好慘同心酸，雖然我冇見過佢喊，但係知佢思鄉好掛住屋企，加上比賽壓力大，所以有乜都會想多啲幫佢。」
雖然只係一件普通嘅連身裙，但著喺6號袁小曼身上即有逼爆效果。
