[香港] 雷曼迷債苦主必讀!

致各雷曼迷債苦主：

本人特別在此申報本人並沒有持有任何雷曼迷債或任何相關產品，並且歡迎各界番印、傳閱、派發或上載本文！

在雷曼迷債事件中，問題的核心根本就是那些所謂的迷你債券，到底係定唔係債券來？係的話又係邊一類型的債券？

因為如果那些雷曼迷你債券，真的「是」債券，例如係同雷曼兄弟公司的資產掛鉤的債券，由於雷曼兄弟公司係資不抵債地破產，咁佢哋發行的公司資產債券就梗係變晒廢紙啦，咁你的『投資』全部化為烏有都係好正常架啫！個情況其實就好似你走去買美國政府發行的國債，夠晒穩陣啦，但好衰唔衰，你買完第二日，成個美國就陸沉兼從此响地球消失，咁你拿着的美國國債，夠立即變晒廢紙啦，啱唔啱先？咁唔通又要相關銀行同特區政府賠番晒俾你咩？你都傻嘅！咁又係咪真係「一個仙」都攞唔番呢？咁又唔係喎！就算那些雷曼迷你債券真的「是」債券，十足的本金同利潤就一定攞唔番架喇，因為在這種情況下，銀行的行為並不構成行騙吖嘛！但你仍然可以從各相關銀行的銷售手法中的疏忽、失當或誤導等，向有關的銀行或機構討回一定金額的賠償！情形就好似一個N年前美國的案例咁，話說响美國有一個婆婆，向麥噹噹買咗杯咖啡，咁麥噹噹夠係婆婆要買咖啡，它就賣咖啡俾婆婆啦，麥噹噹夠冇掛羊頭賣狗肉「行騙」個婆婆咯，但麥噹噹响賣杯熱咖啡俾婆婆嘅時候，只係講漏咗一句「杯咖啡好熱架婆婆」，而最後亞婆又真係俾杯咖啡燙傷咗，咁亞婆就梗係向法庭告麥噹噹索償啦，最後麥噹噹都要賠償番幾十萬俾婆婆啦！所以並唔係話各相關銀行並冇掛羊頭賣狗肉，就一定唔使負責任嘅！咁當然個責任就梗係比行騙細好多啦！

相反，如果那些所謂的雷曼迷你債券，根本就完全「不是」債券，那雷曼兄弟公司同各相關銀行，根本就係响度「行騙」啦，咁仲不乜鬼嘢良誤導銷售手法唧！各相關銀行不單只要全數歸還給我們的雷曼迷債持有人，並且應該要賠償他們的精神、時間同肉體等的損失先至啱！至於那些所謂的雷曼迷你債券到底係定唔係債券，並不是由我話係定唔係嘅，亦唔係由特首曾蔭權話係定唔係就有用嘅！而係要由法庭呀，國際性的金融專家等諸如此類講先至有用架！查實大家只要真係「心水清」的話，就一定會發現，各相關銀行根本從來冇在公仔箱度講過，到底那些所謂的雷曼迷你債券，「係」定「唔係」債券來！而雷曼迷債債仔家陣最應該做的，就是迫令各相關銀行公開﹝例如在電視或各大報章等﹞向全港市民交代，到底那些所謂的雷曼迷你債券係定唔係債券！唔好再給機會各相關銀行响度搞小動作，他們只要公開交代，到底那些所謂的雷曼迷你債券，「是」債券，定還是「不是」債券！就係咁簡單。

此外，千萬不要被什麼高官誤導，話要什麼盡快回購呀，「急市民所急」呀咁！查實佢哋就响處「屈市民屎急」就真！急乜乂嘢唧！應該要「戒急用忍」，搞清楚那些東西到底是否債券來先，咁至啱！

因為如果各下所持有的雷曼迷你債券，真的「是」債券，仲要係同雷曼公司資產相掛鉤的話，就好似最近的星乜乂銀行公佈出來咁，今時今日它的價值早就已經全部是零啦！其實根本當時一出事時，那些同公司資產掛鉤的債券，價值就已經全部係零架喇，咁你仲急乜乂嘢唧！你急唔急它都係零架啦，你根本就拿不回所有本金同利潤的了！咁急來幹什麼呀？至於你話要同銀行追討「責任賠償」，如各銀行銷售時的疏忽、失當或誤導等，根本就同各下所持有的雷曼迷你債券的現行價值是「無」直接關係的！所以即使那些雷曼迷你債券的價值，已經全部是零，各下都依然係可以向有關銀行追討相關的「責任賠償」架，而且仲要係冇明確的時間限制嘅添，咁仲急來仲乜鬼嘢唧！

相反如果各下所持有的雷曼迷你債券，根本就「不是」債券，那各相關銀行根本就是在「行騙」啦，各相關銀行根本就不能以什麼「雷曼迷你債券」只是一個品牌為藉口，就將一些不是債券的東西當債券來賣！個情況就好似，你不能以「可口可樂」是一個品牌為藉口，跟手就淨係入啲水落個罐度，就當「可口可樂」賣俾人一樣！因為，何為一罐「可口可樂」一定會有它的準則，同樣地，何為一隻債券，亦都一樣會有它的準則,對不對？而時間並非一定可以改變事實的！就好似你係可以把一粒玻璃包裝成一粒鑽石去賣俾人，但無論那粒玻璃放在保險櫃內多少年，它都冇可能變成一粒真正的鑽石一樣！因此，只要各相關銀行，所賣的「迷你債券」不是債券，他們就必需把所有本金同利潤歸還給你了，咁你又何需要急呢！所以當務之急，最重要的其實是搞清楚，到底那一系列四十多隻的所謂迷你債券，有幾多隻真係債券，而有幾多隻根本就完全唔係債券先至啱！

因為那些雷曼迷你債券，到底是否真的是債券，係一個非常重要的問題來呀!因為它將會決定你能否成立索償訴訟，能否成功討回所有款項等！那各雷曼迷債苦主，你們為何不盡快搞清楚這件這麼緊要的事先呢！你們一味急急急，有乂用咩！就好似最近亞蘇絲黃响電視度教你哋煮餸一樣，你搵啱咗個方法，一陣就煮完兼且快靚正啦，但如果你唔知個方法，咁你煮一世都聽將啲餸掉落垃圾筒架咋！所以家陣我方法就俾咗你哋喇，但聽唔聽同用唔用就貴客自理喇，因為啲錢係你哋嘅又唔係我嘅！

總結，其實成件事非常簡單，如果雷曼迷你債券真「係」債券，各下就要有心理準備，最多只能收回些少賠償！相反，如果雷曼迷你債券根本就「唔係」債券，咁各下非但理應可以拿回所有本金同利潤，並且仲可以追討各下所有應得的賠償，如精神、時間同肉體等的損失，原因係雷曼同各相關銀行根本就係响度「行騙」，講完！並祝各位好運！