中環在線:懶理家事忙大劉仔單拖撐四川
四川5.12大地震半年後,四川省政府來港為災後重建招商。噚日開幕禮上,華華喺芸芸經驗老到又資深(即係年紀有番咁上下)嘅到場人士當中,發現咗幾張年輕臉孔,就係香港富豪第二或第三代,包括霍震霆囝囝霍啟剛同四叔大仔李家傑,就連一向低調嘅大劉仔,即係華置(127)非執董劉鳴煒,亦單拖到場。喺招商會上,可以見到幾位上市公司主席已經算收穫唔錯,噚日世茂(813)許榮茂同華潤創業(291)宋林就現身支持,全國政協副主席董建華亦有蒲頭,不過更加吸引華華嘅,係年輕一輩嘅富豪都肯出席,尤其大劉仔劉鳴煒,可以話係呢類活動嘅稀客。
霍啟剛(圖)及李家傑噚日出席四川省災後重建招商活動。 梁鑑章攝
李家傑:你咁得閒,跟我嚟學嘢呀?(設計對白)
為創業打通經脈?
之但係佢保持一貫低調作風,唔係咁多記者發現佢,即使有人問佢因乜辭任華置執董,轉做非執董?佢都冇回應。最令華華好奇嘅係,劉鳴煒點解會出現?佢老竇大劉近期家事咁忙,應該冇乜時間出席呢啲活動,會唔會叫阿仔嚟睇吓呢?抑或同前排有啲中環人估佢可能創業有關?點都好,難得佢陪老婆之餘,都花時間到呢啲場合,打好內地經脈,就知佢有幾勤力。睇嚟呢類招商會日後唔憂冇生力軍支持。李華華mailto
iWaWa@AppleDaily.com
劉鳴煒:老竇好忙,我就好得閒!(設計對白)