馮仁昭四圍超：方中信寸子珊咪玩嘢
方中信噚日同徐子珊喺將軍澳電視廣播城出席新劇《杏林心處》嘅拜神儀式，一向被是非纏身嘅徐子珊，最近有傳話佢拍呢套劇時遲到扮大牌玩殘方中信，於是乎問番子珊，佢話：「冇咁嘅事，我都唔知點解會成日俾人講，我反而想話好多謝方中信，今次同佢合作教識咗我好多嘢。我有冇遲到？其實我大部份時間都好準時，就算遲到都係15分鐘左右，不過我都知道遲到係唔岩，所以我都會努力去改。」
方中信噚日話自從有咗個女之後，成個人都變晒，已經唔係浪子咯！
徐淑敏（左）同緋聞男友司徒瑞祈邊行邊講，令身邊嘅楊秀惠變做電燈膽。
不再做浪子
後來，方中信講番呢件事，佢笑笑口話：「畀個膽佢都唔敢，而家淨係我個女先蝦到我，呢幾日我個女冇對住我笑，搞到我個心唔舒服，直到噚日朝早先笑番，我即刻成個人鬆晒，見佢笑得咁開心，就算股票輸幾多錢都冇所謂。我係變咗，仲係變到頭都擰埋，仲係咪浪子？睇怕都要除名，而家都化為烏有。」不過，方中信承認曾經為同子珊合作而擔心，佢話：「我睇到啲周刊咁寫，真係有擔心過，但係相處落又冇乜問題喎，如果有問題佢又點嗱最佳新人呀！」
徐子珊喺方中信面前，坦承開工遲到15分鐘，仲承諾會改過。
