生仔唔嫌多，最近多位高齡星媽搶住生多個，務求好事成雙。08年，莫可欣先斬後奏珠胎暗結，有孕3個月後才通知方中信，事後男方足足用了兩個星期來接受現實。估不到4年後，43歲的莫可欣依然恨生仔恨到發燒。上周六（16日），她帶愛女到上水騎術訓練學校學騎馬，本刊記者聽到她對友人說：「我都想快啲追多個仔。」但你有你追，方中信回應本刊時講到明：「我一定唔會再生。」
據知，二人近日更為生仔一事嗌過交，看來莫可欣想湊夠好字有難度。
聞再生發忟
第一胎懷囡囡時，有指莫可欣先斬後奏，瞞着方中信。如今老婆打算急起追仔，方中信上周四出席《仁心解碼II》活動時，則皺晒眉強調冇planning會再生。兩夫妻意見明顯有分歧。
方中信和莫可欣曾共識「不結婚，不生仔，只養狗仔。」不過男方緋聞一單接一單，最終莫可欣要出動「肚箍」絕招才成功收伏浪子。08年她在生女前兩天才滾水淥腳註冊，成為符太（方中信原名符力）。米已成炊，方中信當時無奈接受。隨着囡囡迦晴出世，由浪子變慈父，方中信密密北上接內地劇搵教育基金。不過，要長期與老公分隔兩地，加上在懷胎期間，方中信曾傳出偷食內地女演員孔維，莫可欣更加提心吊擔，多年來一心諗住生多個B箍老公。
你試吓再自把自為!(設計對白）
浪子變慈父
方中信08年驚聞莫可欣大肚，坦言要兩個星期才接受到，但自從女兒符迦晴出世後，方中信經常上載帶女兒出外遊玩的照片上微博，浪子竟然變慈父。
16/3吐露要追仔
43歲莫可欣上周六帶囡囡到上水雙魚河騎術訓練學校學騎馬，記者聽到她和一眾媽咪傾偈時，真情流露講明恨追仔，更坦言最好生多兩個先收爐。
娘爆湊女
貴為港姐冠軍的莫可欣，當日着件see-through底衫外襯娘到震大花背心，配條shocking pink褲，仲要加對大吊耳環。全身錯配，更將水桶身形表露無遺。
囡囡月使兩萬
方中信和莫可欣的女兒現時就讀九龍塘Kingston國際幼稚園，學費每月八千，加上學騎馬等高消費課外活動，每月支出二萬以上，難怪方中信坦言靠無綫人工唔夠使，寧願返大陸搵人仔。
缺乏安全感
上周六（16日），方中信撇下妻女，為黃長興婚宴做兄弟。至於莫可欣則揸住Audi房車接送愛女迦晴到上水雙魚河騎術訓練學校學騎馬。當日不少家長都攜同子女到場，莫可欣順道與各人分享湊女心得。其間，記者走近莫可欣身邊，聽到她的好友大讚迦晴靚女似足母親，更追問莫可欣會否為女兒添多個伴。難得莫可欣實話實說：「我都好想快啲追多個仔呀，生多兩個都冇所謂，不過唔知得唔得……」說時一臉惆悵。
據其密友透露：「可欣本身冇乜安全感，阿力（方中信）夜啲返都會胡思亂想。其實阿力好錫老婆同個女，以往佢淨係掛住玩車，依家都好少約朋友出嚟，話要留番啲錢同老婆、囡囡去旅行。不過可欣又唔係咁諗，總之一唔見老公就call到佢覆電話為止。可欣都有講過想追多個先收工，不過佢𦧲得掂個老公先算啦。」
去年方中信在國內接了兩套電視劇《全城高考》（右圖）和《勇敢遊戲》，他透露今年亦接了兩套大陸劇。雖然錢搵多咗，但08年莫可欣佗囡囡時，方被拍到在北京攬實同劇女演員孔維（左圖）。有「偷食」前科，難怪莫可欣要生仔箍實老公。
北上搵學費
4年前，莫可欣單方面宣布懷孕，方中信嬲到向傳媒發晦氣：「妖，我都唔係知早你好多！」盡露不滿之情。B女出世後，他更多次發表「一個夠晒數」言論：「仲追？唔好搞啦，已經好煩。今日孭條擔挑（女兒）上身，要孭足廿幾年。嚟緊都唔買得車、唔買得錶、冇得買船。今後冇得做型男、冇得做浪子，要做湊仔公。」明斷莫可欣後路。
據知今次莫可欣急於追仔，皆因方中信與無綫的合約已屆滿，方打算長駐內地拍劇搵人仔。近期多位小生偷嗒國產女星出禍，前車可鑑，莫可欣當然想設法留老公在港工作，避開誘惑。知情人續說：「阿力接內地劇都係想搵多啲錢，喺香港邊搵到食啫。不過可欣話寧願老公簽TVB拍劇，酬勞少啲都冇問題，至多慳啲使。」
老公冇表情
上周六（16日），莫可欣帶囡囡騎馬後，晚上就繑實老公出席黃長興的婚宴。為生仔正與老婆鬧分歧的方中信，當晚木無表情，到場時更冇拖老婆。
揸電單車生晒
對生仔耍手擰頭的方中信，當日揸住黃長興借出的Can-am spyder機動三輪車，卻萬分雀躍，全程蓮子蓉面口。
以往愛女放學，方中信若在港，例必會陪莫可欣湊女放學，但周二（19日）當日就只得莫可欣一個接囡囡放學。母女在附近商場食完晏後，下晝兩點半回匡湖居。不夠十五分鐘後，才見方中信揸車返回家中。
為生仔嘈交
據知，有意想追多個的莫可欣，近日多次在方中信面前，以試探口吻暗示想追仔。但每當觸及這個話題，方中信都耍手擰頭，二人更因此事試過嘈交。
對於莫可欣想追仔，方中信周三（20日）透過電話斬釘截鐵向本刊表示：「無條件追啦，一個就夠數啦，一定唔會再生，再生多個就分薄咗。」當記者表示聽到莫可欣向朋友提及想追多個，方中信反應極大說：「吓！佢有同你哋講呀？唔係呀？夠㗎啦！一個夠啦！（如果有意外再懷孕點算呀？）咁意外嚟到……都要接受，盡量避免唔好殺生囉！（你哋依家有冇做安全措施？）唉！我都一把年紀，呢家嘢（性行為）唔係好大興趣啦！」
對於續約無綫，方中信則說：「我想自由啲，唔會簽無綫啦！佢唔搵我仲好，香港搵得幾多？我想返內地拍劇搵多啲（子女）學費。嚟緊會返內地拍兩套電視劇，成半年時間唔喺香港。（係咪莫可欣想生番個仔嚟箍你？）唉，總之依家乜都貴，唔生㗎啦！」雖然方中信把口話唔生，但五年前都試過「搞出人命」，係就係難啲，不過莫可欣未必冇機！
爆《仁》劇情
蒙嘉慧撬贏反派楊怡
方中信孭飛的《仁心解碼II》，其前妻徐子珊已死。故事初段的感情線，是他與精神科顧問醫生蒙嘉慧日夕相對下，女方由欣賞到傾慕他，兩人逐漸發展出真感情。中段卻殺出臥底差婆楊怡，由於經常與方中信合作查案，因此楊怡亦暗中對方中信嗒糖，更用盡暗招撬蒙嘉慧牆腳。但劇情到後段，方中信發現原來楊怡一直患有嚴重精神分裂症（下圖），而轟動全城的連環兇殺案，殺手竟然是她。方因此大義滅親，最終他與蒙嘉慧結婚。
