馮仁昭四圍超：返港晒幸福 李美鳳同情林敏驄
嫁人多年做咗幸福少奶奶嘅電眼美人李美鳳前幾日返咗香港，佢應一個名牌邀請做代言人影靚相，佢被問到有雜誌踢爆佢多年前同林敏驄已經註冊結婚，提番呢段舊事，佢好淡定咁話：「佢（指林敏驄）都回應咗，雜誌出街過陣我喺加拿大度緊假，都有睇呢篇報道，知道佢回應咗，我就唔會回應，唔想將啲舊聞拖長，咁耐之前嘅事，唔值得再提，唔需要將啲十幾廿年前嘅愛情拎番出嚟做新聞，世界上要關心嘅新聞仲有太多啦，不過，都多謝大家關心。」
李美鳳被問到多年前同林敏驄（左）嘅情史時，佢就話唔想再拎番啲舊事出嚟講。資料圖片
林敏驄同陳伶俐離婚，李美鳳就話同情全世界嘅婚姻失敗者。資料圖片
嘆婚姻難經營
李美鳳又話：「而家我婚姻好美滿，覺得自己真係好幸福同幸運，老公（台灣富商鄭翔中）同佢屋企人都好錫我，而家我除咗照顧老公同仔女外，都想花多啲時間做吓慈善回饋社會，特別想幫啲智障同老弱嘅人。」問佢同唔同情婚姻失敗嘅阿驄呢？佢就話：「婚姻真係好難經營，係一大學問，而家世界上離婚率實在太高，好普通，我同情全世界婚姻失敗嘅人，同埋因為父母婚姻失敗嘅小朋友。」咁同阿驄仲有冇聯絡？佢就話：「好多年冇啦。」
狀態仍然大勇嘅李美鳳話已經好多年未同林敏驄聯絡。攝影：陳慧安
李美鳳同台灣富商鄭翔中結婚多年，佢話自己深獲丈夫愛錫，幸福滿瀉。資料圖片
