痤瘡（上圖）、粟粒疹（下圖）
衞生署家庭健康網頁圖片
健康blog
朋友Anna 上個月生咗趣致可愛嘅BB 女，但BB 原本又白又滑的肌膚近幾日竟然生咗好似暗瘡嘅痘痘，令媽媽又疑惑又擔心，「暗瘡唔係踏入青春期先有嘅咩？」
懷孕時由母體傳入
為咗解開BB 生暗瘡嘅謎團，我醫神翻查咗好多醫學資料。原來BB 真係會有暗瘡，學名叫做新生兒痤瘡（Neonatal Acne ），係懷孕期間由媽媽唔覺意傳咗畀BB ，通常三個月左右會自己好番，但千祈唔好同BB 唧暗瘡，好易留下疤痕。
衞生署家庭健康服務網頁有好多介紹BB 護理嘅資料，好似新生兒痤瘡通常會係BB 出世頭幾日至幾星期出現，成因係懷孕期間，媽媽嘅荷爾蒙經胎盤傳咗畀BB ，令BB 荷爾蒙失衡而生暗瘡。
呢啲瘡通常係細細粒嘅紅疹，生係BB 額頭同面頰度，基本上三個月內會自然消失，唔使特別睇醫生或者搽藥，最緊要係保持皮膚清潔乾爽，唔好以為幫BB 唧暗瘡可以快啲好番，小心喺BB 嫩滑肌膚留低好似「火山口」嘅暗瘡印。
另一種比較少人認識嘅BB 皮膚病係嬰兒粟粒疹（Milia ），BB 額頭、面頰同鼻有時會生啲白色或黃色嘅小粒粒，用手摸感覺比較扁平，成因係BB 嘅皮脂腺未完全發育，令皮膚生粒粒，通常兩、三個禮拜就會好番，同新生兒痤瘡一樣唔使特別護理，但唔可以擠壓啲粒粒，唔係好容易會發炎。
blog 主：醫神
