吳亭欣與曾權威在怡東酒店撐完枱腳步出酒店時，臨走吳亭欣搭住曾律師膊頭，關係密切，係咪拍膊頭咁簡單呢？
亞視一姐吳亭欣（Lulu ）上月被拍得跟息影女星顧美華的富商妹夫馮潮澤過從甚密，二人仲撐枱腳食魚蛋粉兼返女方香閨。事隔唔夠一個月，本刊卻發現吳亭欣密密約會跟葉翠翠及陸詩韻都有「交情」的富貴律師曾權威，而月入僅萬多元的她更揸靚車住靚屋著名牌。
吳亭欣忽然富貴，就連曾律師接受本刊訪問時都讚佢醒過葉翠翠同陸詩韻，「吳亭欣最醒，識得黐住我，佢有乜事我都會幫佢。」
吳亭欣兩個月前開始在銅鑼灣yoga yoga 學跳肚皮舞，她說：「喺高尚啲嘅地方學，自然識嘅朋友都高尚啲。」唔怪得識咁多闊佬啦。
上月29日，記者於銅鑼灣怡東酒店意大利餐廳Cammino 發現吳亭欣跟曾律師撐枱腳。
吳亭欣話裝備自己最緊要，識有錢佬都易啲，早前她在Joyce 豪花$16,500買了一個Balenciaga 紅色手袋。
吳亭欣唔怕俾人話靠黐，照約曾律師歎意大利菜，事後曾律師解釋：「我介紹徒弟清洪免費做佢法律顧問啫。」
2月初，吳亭欣突然花35萬買Audi 房車，她聲稱買車係爹哋畀錢：「佢想我返工方便啲啫，我要靠男人都係靠爹哋啫。」
記者致電吳亭欣，問她先黐顧美華妹夫後埋曾律師堆，是不是想學葉翠翠及陸詩韻靠黐有錢人發達，她激動說：「佢（馮潮澤）係咩副主席之嘛，有錢極有限啦，我家底仲厚過佢啦！」她又晒命：「我老豆喺龍崗有間電子廠，窮就供唔到我讀美國UCLA 啦。」自認係千金小姐，但吳亭欣卻坦承恨嫁入豪門，她說：「逢名人party 我都去，咁樣先識到多啲有錢人！」
而曾律師亦大讚吳亭欣最醒，「陸詩韻層樓？租之嘛，人哋唔畀錢咪冇得住咋。吳亭欣最醒識黐住我，邊個男人有錢冇錢，呃唔到我，所以佢黐邊個都問過我。」
吳亭欣埋親身都係富家子弟，去年傳與利承武發展，後因蘭子介入而退出。《壹週刊》圖片
