林苑（右一）同友人（左一、二）率先離開飯店。
側田同林苑呢pair 緋聞情侶俾人影到拍拖食飯已經唔係第一次，但次次都鬼咁避忌。日前佢哋約埋一班女性親友去跑馬地「譽滿坊」食午飯，食飽走過時側田最後一個出嚟，但急急腳第一個上車，好似慌死俾人見到佢咁。
側田最尾至出嚟，但就一個箭步率先跑上車，一啲風度都冇。
林苑同友人喺金鐘落車，揮手拜拜，以為佢會去太古廣場shopping 。
點知轉個頭佢就自己一個去排隊搭的士，高挺嘅胸部非常搶眼。
原來佢搭的士落中環。過幾分鐘車程，點解側田唔送埋女友呢？
之後側田用保母車載幾位女士去金鐘太古廣場，放低埋林苑等人，自己就走人，全程冇落過車。不過最奇怪係原來林苑同友人say bye 後，又要即刻自己一個搭的士落中環，見佢挺住大胸排隊等的士過陣，引來唔少男士眼望望。
唉！側田為咗唔同林苑單獨同「車」，就忍心對方大汗疊細汗同人逼餐死，呢個男朋友真係……，最難得係林苑又唔介意喎。果然一個願打一個願捱咋！
