成功擺脫瘦身嘅鄭欣宜，前晚以新歌《你瘦夠了嗎？》嘅造型做側田紅館騷尾場嘉賓，欣宜現身令現場包括梁漢文、劉浩龍、鄧麗欣、莫可欣、尹子維及C AllStar等觀眾拍爛手掌，欣宜先狂擺身體伴舞，側田從輕摸欣宜秀髮，再由膊頭摸落腳，之後欣宜反客為主從後除開側田外套，兩人最後以借位扮咀結束火辣演出。
側田指每逢dead air都會除帽搞嚇氣氛。
除帽搞氣氛
演唱會上，側田介紹新專輯收錄三首廣東話兒歌，佢話：「我覺得廣東話兒歌過往有少少差，有啲戇居，啲song quality做得麻麻，我認為小朋友都有權聽啲好嘅兒歌。」負面新聞不絕嘅側田亦承認上年曾因此而自困屋企一個禮拜，當時感到孤獨同冇人傾訴。
完騷後側田接受訪問，對於再次喺台上除帽惹起觀眾尖叫，佢話每次除帽大家反應都好好，所以會睇情況用除帽嚟搞氣氛。佢又大讚欣宜掌握舞台技巧超正，若果可以嘅話，走埠時都想繼續搵欣宜做嘉賓。講到兩人差啲咀到？佢笑住話：「係我想箒，其實呢part想到做哥哥同梅姐喺舞台上嗰種熱愛，當然我做得冇佢哋咁好。」
撰文：馮仁昭
喺演唱會入面，側田自爆舊年被負面新聞影響自困家中一個星期。
同一班小朋友一齊表演嘅側田，批評以前啲廣東話兒歌有啲差同戇居。
劉浩龍（左）同梁漢文前晚一齊欣賞側田尾場個唱。
from:
http://hk.apple.nextmedia.com/entertainment/art/20150608/19175989
