堪輿學家麥玲玲撈過界染指娛樂圈，孖住英皇藝人范振鋒及冼色麗（Bonnie）等，拍攝食品廣告兼參演新劇《牛頭愛搭馬嘴》，麥玲玲更出動私伙衣飾演活報社女高層，她直言推掉高層樂易玲「加騷錢」的好意，旨在留守電視台「密食當三番」，她搞笑謂：「加薪咁貴仲邊個會用我？唔會打爛我飯碗呀，我覺得拍劇好好玩。」事實上為遷就拍劇檔期，她推了不少工作，保守估計損失200萬。
麥玲玲（中）、范振鋒（右二）
對於廣告拍檔范振鋒近月連番開設食肆，麥玲玲說：「阿范同Bonnie都屬牛，阿范今年有機會做爸爸，而Bonnie喺影圈嘅發展都唔錯。」嚇得打算於事業上全力衝刺的阿范汗顏，反問：「唔係啩！遲啲先啦。」
冼色麗被批今年發展不俗。
側田減磅戒飲酒
側田前晚喺新蒲崗為國際無伴奏合唱節綵排，見到脹爆側田清減咗，佢話：「之前肥到好多衫都着唔到，要做澳門演唱會，𠵱家減咗十幾磅，仲戒飲酒，等做完騷之後先飲。」
其實喺澳門騷之前，側田會做個慈善音樂會，同一班學生表演兩首歌，其中一首係《命硬》，佢話自己同首歌名唔一樣：「我個人唔係好命硬，係得個名，我個人好易心軟，好易俾人𠱁，耳仔軟，係yes man。」
