企起身夾點心，趙碩之服侍周到，
到林建名口擘擘。
大名娛樂旗下的第一代四葉女戴夢夢，一直被老闆林建名視為白雪公主，直到同門的新人趙碩之晉身成為新一代四葉女，憑住34D 身材，加上肯露肯搏，老闆林建名更大讚對方索過林志玲，32A 戴夢夢終於火燒後欄，俾人恰到上心口。
早前，二人陪老細出海遊艇河，兩女同場正面交鋒，爭到出面。
戴夢夢
趙碩之
白雪公主Vs 老翻志玲
戴夢夢（Renee ）
第一代四葉女
年齡：23
身高：160cm
三圍：32A-24-33
老闆評語：靚過白雪公主
趙碩之（Wylie ）
第三代四葉女
年齡：21
身高：172cm
三圍：34D-24-34
老闆評語：索過林志玲
論身材戴夢夢（右）當然唔夠師妹嚟，但一上船就搶住同老闆合唱《相思風雨中》，趙碩之（左）冇份。
林建名的82呎遊艇Sunshine VI ，睡房大床天花有塊半圓形的大鏡，非常香艷。
鬥到出面
早兩個週末，林建名相約公司旗下一眾藝人，連同兒子林孝信及女兒林瑋珽出海，眾人先在西貢匡湖居會所中餐廳飲茶集合。老闆甫出現，戴夢夢及趙碩之即時左右夾攻，五歲已經入行做童星的戴夢夢老闆前老闆後，斟茶遞水做到足，另一邊的趙碩之亦唔執輸，馬上將枱面各式各樣的點心夾到老闆的碗中，又嗲聲嗲氣地說：「林生，我呢排拍四葉草曬到手腳都有兩截色，你睇吓。」
上到船，戴夢夢第一時間把握機會同老闆合唱懷舊K 歌《相思風雨中》，搞到林建名非常開心；但趙碩之更高，竟然出奇招狂換衫，上船前後換足三件衫之外，更越換越低胸，34D 心口睇到老闆幾乎噴血。32A 戴夢夢唔夠砌，唯有出口寸爆：「大波係佢（趙碩之）嘅selling point ，我不嬲都係小波地，嬌小玲瓏有唔同嘅美。」
趙碩之著住三點式泳裝與《四葉草》監製錢國偉攬腰合照，還將照片放於個人網誌上，令她即時成為新聞人物。擁有34D 魔鬼身材的她，月尾還會推出個人寫真集。
百萬力捧
大名娛樂先後於去年及今年初簽下戴夢夢及趙碩之，並豪花過百萬力捧，二人更會在八月同期出唱片。「佢（趙碩之）都出唱片咩？我出大碟，佢好似係單曲啫！大家走嘅路線都唔同。」表面上，戴夢夢無將趙碩之放在眼內，但卻心存顧忌。
至於被師姐狂寸賣弄身材的趙碩之則反駁：「我都覺得自己好好彩嘅，總之各有各做啦，其實之前我都去過老闆廣州嘅屋企玩㗎，佢同我哋一班後生仔女好岩玩。」
至於年初被雜誌指爛蒲爛玩的林孝信，當日雖然亦有份同老豆出海，但全程坐喺遊艇上層曬太陽。好明顯，32A 戴夢夢抑或34D 趙碩之，不論大細，都唔岩林公子胃口，一干人等玩到太陽落山，就各自散band 。
林建名（中）帶同兒子林孝信及女兒林瑋珽出海，經常被指是新一代「花花公子」的林孝信在老豆面前即時變乖乖仔。
