「風流大少」林建名前晚開P慶祝78歲生日，繼續多情多女圍，原來與他拍拖兩年的台灣女友更專程來港賀壽「坐正」隔籬，傳過「爺孫戀」的旗下藝人何傲兒就掹車邊坐主家席。大少雖經歷兩次婚姻失敗，原來他依然相信愛情，對婚姻有憧憬，生日願望更希望結婚生仔：「都想有一個老婆，年紀老要人照顧，想搵個有心照顧我。」
人生七十古來稀，人稱「大少」的林建名年近八旬屆花樣爺爺之齡，仍然有心有力愛熱鬧，依然有頑強媾女能力。前晚他在尖沙嘴慶祝78生日搞party，以熱帶雨林為主題，旗下藝人包括曾傳出「爺孫戀」的何傲兒、「契女」戴夢夢、胡渭康、范振鋒等以cosplay造型現身祝賀。
縱橫情場半世紀有多，大少當然有女陪，作為壽星仔的他全晚在主家席坐定定，卻不愁寂寞，原來與他拍拖近兩年的台灣女友專誠飛來與慶祝。「名女郎」身穿halter neck花裙，坐在大少隔籬，儼如女主人身份現身。至於傲兒BB雖有份坐同枱，但獲分配坐對面位置，顯然不夠台灣女友得寵，她全晚惟有玩手機解悶。
現任台灣女友「坐正」林建名隔籬，何傲兒雖同坐主家席，但就坐對面。
林建名昨晚與子女食飯慶祝。
想有人照顧
大少與女友大部份時間都孖公仔姿態留在自己座位睇表演，二人玩到近凌晨離開，大少扶著夢夢玉手率先步出，全程笑笑口似乎玩得相當盡興，而女友則尾隨，她見大少與夢夢男友Ricky打招呼問好，即自動波先登上座駕，而大少與Ricky寒暄完亦上車，相信二人齊齊返歸休息。
本報記者昨日致電大少，大少表示派對玩得好開心：「傲兒、夢夢個個都有送禮物，佢哋有心就得啦，生日願望都係大家唔好咁多爭拗（指香港政治），自己好就得人，冇乜爭拗。同埋想個仔快啲成家立室。」提到他全晚有女相伴，大少直認對方的女友身份，他笑言：「佢係我其中一個女朋友，仲有一個以前嘅女朋友都有嚟，佢都結曬婚生埋仔。」記者笑他大一歲依然花心，他表示：「個個都係嚟嚇走嚇，好似𠵱家呢個，都唔喺香港住。」大少直言要認識不同的女仔，保持心境健康：「識多啲朋友傾嚇偈，生日願望都想有一個老婆，好多時我都係自己一個人，冇人照顧我，搵個男看護唔係好掂。」他坦言現任的台灣女友不適合：「佢未得，未得，佢唔係好識照顧我，我咁嘅年紀要人照顧，啲女嫁曬唔得閒理我。」
胡渭康與范振鋒在台上為大少送上生日歌賀壽。
唔介意生仔
過往他的女伴如走馬燈轉，年紀更是十八、廿二類妙齡女子居多，問到大少揀老婆條件？他說：「要揀個真係可以照顧我，年紀大啲都唔介意，要識咗幾年，知真係有心想照顧我，好似看護咁，樣貌唔靚我唔欣賞，唔靚我都傾唔埋，唔使講。」結過兩次婚，生了三女一子，大少依然憧憬再婚，甚至再做爸爸，他表示：「如果結第三次婚，我都會接受，生小朋友都冇所謂，我都鍾意細路哥，但係都希望啲孫乖就得。」
大少作為爺爺級鑽石王老五筍盤，現講到明想再婚，必吸引有志之士，問會否考慮早前曾譜相差52年的「爺孫戀」的何傲兒，他當日兩度為傲兒BB落淚，如初戀般痴情教人動容，不過大少以肯定口吻指，不會對傲兒BB有非份之想：「唔啱，佢係我藝員，唔會有關係。」
採訪、攝影：朱志聰、吳耀輝、潘冠恩
from:
http://hk.apple.nextmedia ... 150830/19275137
