當年明搶人夫，擺明做小三的戴夢夢，同太極Ricky（朱翰博）拍拖兩年，隨着今年六月女方同品酒師痴纏遊澳門斷正，這段父女戀亦告玩完。
分手幾個月，夢夢同Ricky原來悄悄復合，日前兩人孖住落九龍城買家品，男方全程做阿四，服侍周到外，還孖實女友流連地產鋪密密斟，目標明確睇該區買盤，夢夢坐正做朱太指日可待。
睇樓盤半個鐘
戴夢夢同品酒師玩完後，又同太極鼓手Ricky翻撻，呢日見到戴住黑色口罩的夢夢，孖住男友四圍逛，兩人先行精品文具店，行完一間再一間，夢夢一時興起拎起party帽試戴，惹來店內的客人望多兩眼。
夢夢在精品店磨足半個鐘終於有收穫，Ricky九秒九返去車上幫女友拎背囊搵錢找數，離開時還自動自覺做阿四幫夢夢拎住戰利品。
以前有個做投資銀行的老婆射住，Ricky一身名牌，身光頸靚，而家要密密做，養埋戴夢夢，Ricky唯有慳住使，買衫的選擇頓變出口店，他左摷右摷，主力揀阿伯款式的長袖T跟外套，戴夢夢完全零興趣先行離開，行去附近的日本城掃家品，無收穫的Ricky會合女友後，目標明確行去一街之隔的地產鋪，兩個人於鋪外指指點點密密斟，目光主力集中在買盤上，研究近半小時先捨得走人。
Ricky主動帶夢夢睇地產，目標清晰，睇過千萬的該區買盤。
貪得意試戴party帽，惹來店鋪客人望多兩眼。
Ricky到出口店揀衫，但沒有收穫。
有望坐正
戴夢夢同Ricky相差十九年，拍拖期間不時被傳媒影到二人在街上吵大鑊，外間一致睇淡。拍拖兩年，半年前在毫無先兆下，夢夢同品酒師Sam Chong親密遊澳門斷正，女方才承認同Ricky已經分手。
有指兩人分手的導火線是男方毫無結婚的念頭，令好勝的夢夢無望坐正做朱太。如今兩人成功翻撻，繼早前逼到Ricky買婚戒後，今次男方又肯主動睇樓計劃築愛巢，夢夢隨時有機會狗年（一八年）坐正做朱太。
夢夢有心水，Ricky馬上跑返車幫女友拎背囊找數。
離開鋪頭，夢夢好順手將戰利品交俾Ricky。
夢夢做司機載Ricky，上車後先有面除口罩見人。
夢夢積極埋身照顧Ricky獨子，為做「後底乸」作準備。
撰文：娛樂組 攝影、攝錄：陳亦龍、余一駱
好事近戴夢夢翻撻Ricky密謀買樓
