賣命咩.....真係唔好太貪靚..自自然然最好...娛樂圈真係唔係普通人可以立足到
真面目:20歲殼70歲偈 百病裕美停工大執出道只有一年，中日混血兒裕美憑住正牌㗎妹血統瞬即在娛圈插旗，密密有job 接，手執多個廣告代言，點知上月，裕美突然在台上嚎哭，仲話要停工撼旗。
原來裕美在半年前發現聲帶起繭，以至突然失聲，注射過類固醇開聲針亦無效，裕美惟有咪嘴唱。更嚴重的，係貪靚裕美過量服食減肥藥引致血壓高，又患有胃酸倒流、記憶力衰退、失眠等病症，20歲女外形卻十足70歲老人家體質，未老先衰，隨時冇得撈！
失聲不特止，裕美的聲帶更有惡化跡象，分分鐘動手術除「繭」，到其時裕美便要更長時間休息，她所屬的經理人公司Snazz 老闆叻哥（陳百祥）已勒令裕美停工兩個月，手停口停，保守唔見20萬收入。
亂食減肥藥
上月21日，裕美聲沙沙接受本刊訪問。提起自己百病纏身，裕美忍唔住眼濕濕。「因為我帶有日本人血統，日本女仔下身較肥，我中二貪靚就開始自己買減肥藥食。兩年前發現啲藥令我血壓高，唔敢再食，但係血壓冇正常番；而我自細又有胃酸倒流，醫生話胃酸傷到我聲帶，加上我先排用錯唱歌方法，結果搞到聲帶起繭，如果個繭再大啲就要開刀。」
慘被病魔煎熬，裕美焗住啪藥做藥煲。身體機能亦愈來愈差，兩個月前更開始失眠，搞到經期失準兼面腫眼腫。冇健康仲冇埋收入，「我記性仲差咗好多，唔夠5分鐘前嘅嘢都唔記得。醫生話我20歲人，但身體機能就好似70歲咁。我真係好驚自己有排唔做得嘢，供唔到樓，冇錢畀家用兼要向公司借錢找之前嘅化妝髮型數。」
手停口停，獨女裕美除咗供樓仲要養媽咪，唔快快調理好身體，真係分分鐘揸兜。
面腫腫
宣布休息後，裕美仍要完成手頭上的工作。上月21日面腫眼又腫的裕美本來約好髮型師set 頭，點知食得安眠藥多唔知醒，出席活動遲到半小時。
肥仔針
容祖兒、張敬軒都打過開聲針，其實開聲針含類固醇成分，會引起副作用，勞永樂醫生指：「類固醇係用來壓抑免疫能力，所以好多歌手開演唱會前打開聲針，演唱會完咗會去見fans 、去慶功，其實好容易感染到病毒，引發其他疾病。」勞醫生更指過量注射類固醇會導致糖尿病、肥胖、高血壓、骨質疏鬆等後遺症。
冇營養
為了減肥，裕美以往除吃減肥藥和做運動外，每餐只吃青菜當飯，長期營養不良，鐵打都死啦！
百病纏身
裕美雖然只得20歲，但由於佢曾經長時間食減肥藥，導致部分器官出現毛病，身體狀況跟一個70歲阿婆冇分別。
經理人公司老闆叻哥（左）一向當裕美契女，知道契女多病即下令她休假兩個月，就連訪問都禁接。
負擔大
裕美身兼7個廣告代言人，包括東瀛遊、花旗財務及化妝品牌Missha 等，連埋其他工作，估計裕美半年已賺50萬。賺錢雖然唔少，但裕美現居的將軍澳裕明苑600呎居屋，仍要每月付萬元供款，兼畀家用養媽咪。裕美之前向經理人公司墊支的置裝費亦要交還。負擔咁大，難怪裕美驚到喊。
上月15日，裕美到馬鞍山表演時失聲唱唔到歌，大會安排佢「咪嘴」，但裕美擔心前途受影響忍唔住狂喊。
