上週首播嘅《野蠻奶奶大戰戈師奶》首集叫好叫座，收視重上35點，咁多人睇除咗因為阿姐、杏兒夠玩嘢外，第一集就出動三點式，盡騷34D 勁爆身材兼44吋長腿飾演大美人嘉嘉嘅李亞男亦夠搶鏡。
雖然得10分鐘戲分淪為大茄，但首曝光即引嚟大班電車男𥄫實，仲有唔少網上留言激讚佢「好索」，鋒頭勁過配角嘅咪精徐淑敏（Suki ），清純外表加魔鬼身材，23歲李亞男火速成為08年新咪精，誓要再狙擊當年華姐手下敗將陳法拉！
貴為05年華姐冠軍嘅李亞男，過去2年走玉女路線，事業無大起色，演出機會更不及靠姣上位嘅同屆亞軍陳法拉。眼見陳法拉拍劇騷身材上位快過打針，擁有34D 惹火身材嘅李亞男亦不甘被埋沒，實行有樣學樣。估不到就係呢次忽然性感，引得Slim Beauty 睇中成為纖體代言人，正式加入咪精行列。
翻炒法拉
被定型為新咪精後，近日無線新劇《法政先鋒2》開拍，戲中水著戲分亦預埋李亞男，雖被指行法拉舊路，但她坦言冇所謂：「有機會拍劇要珍惜，監製搵得我都係因為我有身材啫，都係好事嚟㗎！」問到佢有咩好過法拉？李亞男直話直說：「我高過佢囉！」
富豪飯局
既大咪又長腿，仲有5呎9model 身形，李亞男自言搵男友很難：「我都feel 到有圈內人對我有好感嘅，不過就冇人主動約過我！」樣靚身材正，李亞男唔單只成為電車男心目中嘅「大美人」，更有富豪auntie 想搵佢「飯局」。
「都係一啲annual dinner ，有啲auntie 走過嚟問我嗱電話，問我同唔同佢個仔食飯喎！」不過佢坦言一次都冇應約，「我諗到時候神會話畀我知㗎喇！而家佢叫我專心工作，所以我都冇諗拍拖！」淨係唔拍拖呢樣嘢已經夠贏法拉啦，TVB 高層錫晒！
砌贏法拉
大咪美人
比起選華姐當日，李亞男身材冇咁fit 啦！所以拍攝當日都要不停縮肚，一縮肚就顯得34D 上圍更加迫爆！
網友讚爆
雖然得10分鐘戲，不過已經令一眾網民印象深刻，仲即刻響留言版度力撐李亞男好過陳法拉。有fans 支持，李亞男呢次露都值得！
