王祖藍為迎娶心目中嘅公主李亞男，前晚喺香港迪士樂園舉行咗個童話婚禮，圈中好友紛紛到賀，婚宴開始後冇耐，曾志偉拉隊同新人上台玩遊戲，玩完人浪再頒最佳衣著獎，結果由扮烏蘇拉嘅魯芬同埋扮女人嘅張晉魔後贏到大利是一封。之後一班藝人分組玩傳紫菜，錢嘉樂揀咗同亞男妹妹合作，仲先向老婆湯盈盈申請：「老婆，我『焗』住玩㗎。」最後張繼聰嗰組輸咗，罰飲咗七杯酒，而逢P必醉嘅志偉因為要坐夜機，未有爆醉離場。
錢嘉樂前晚揀咗同李亞男妹妹玩傳紫菜遊戲。
未打算造人
藍男噚日又為蜜月節目喺將軍澳做宣傳，亞男仲未改到口叫祖藍做老公，祖藍即刻話：「叫老公呀！仲叫祖藍。」亞男就怕怕醜醜叫一聲：「老公……」亞男話：「屋企有嘗試叫老公，叫完自己都毛管戙。」祖藍自爆被婚宴感動到喊，佢講笑話：「喊咗一公升眼淚，今日下午化妝諗起都仍然喊，真係好感動。」亞男則大讚祖藍在婚宴上為老婆高歌一曲《青蛙王子》。問到志偉送佢哋AV碟學洞房，祖藍話：「未拆禮物。」藍男暫未有造人大計，佢哋話要享受二人世界。
撰文：馮仁昭
馮仁昭
from:
http://hk.apple.nextmedia ... 150217/19044835
