【連環啜啜】
王祖藍和李亞男應要求咀足四次，更向傳媒大騷結婚戒指。
昨日情人節，亦是王祖藍和李亞男成婚的大喜日子！一對新人均是虔誠的基督教徒，昨日於教堂行禮，在牧師、親友及一眾弟兄姊妹見證下說：「我願意。」祖藍承諾要用餘生去愛及專一服侍老婆仔。新郎哥祖藍好眼淺，由頭喊到尾；反而索爆新娘子亞男在致辭時大放笑彈，令現場充滿歡欣淚水與笑聲！
現年三十五歲的王祖藍與年輕五歲的華姐冠軍李亞男昨日在九龍城浸信會行禮，「長短腳之戀」終於修成正果。二人在圈中人緣甚佳，逾二百人觀禮，近一半是圈中人，包括前輩級嘉賓許冠文、鍾景輝及毛舜筠等，還有多對圈中夫婦帶埋星二代，如陳國邦羅敏莊和囡囡、洪天明周家蔚和仔仔及錢嘉樂湯盈盈和囡囡。
儀式於下午二時開始，穿上大露背拖尾婚紗的亞男由爸爸帶領進教堂，蔡少芬與張晉等三對愛侶合唱詩歌《全因有袮》，之後由牧師帶領祈禱，再由杜麗莎唱出《Because of Who You Are》，一對新人互望已開始落淚，姊妹們也跟住一齊喊，場面感人。
【喊足全程】
整個行禮過程，祖藍由頭喊到尾。
【執子之手】
索爆新娘穿上低胸大露背裝拖着祖藍，祖藍眼濕濕仍未喊完。
「你係上帝派嚟嘅天使」
到證婚儀式時，牧師搞笑地說：「仲有機會反悔，你（祖藍）係咪願意？」祖藍大聲說：「我願意！」並邊喊邊說：「李亞男，你係上帝派嚟嘅天使，感謝你嘅愛，圓滿咗我嘅生命，我愛你，但係我嘅愛，並唔完美，我願意用我嘅餘生，同你一齊……從今以後我會專一服侍你，正如我專一服侍神一樣。」之後兩人交換戒指及簽婚書，祖藍聽到王菀之唱《彩虹下的約定》又爆喊，牧師宣佈二人正式成為夫婦。祖藍揭起亞男頭紗，兩人拖着手肉緊地錫到脷叠脷，全場歡呼，祖藍大叫「哈利路亞」，全場起立唱詩歌《歡欣》，禮成後兩人拖住手不停左右搖晃，真是好興奮，恭喜恭喜！
祖藍在台上再一次多謝父母及到來的親友，憶起亡父感性地喊不停，還繼續冧老婆謂：「識佢嘅人都知道佢唔係個樣靚，最靚嘅係個心。」亞男致辭時，想不到傳承了祖藍的搞笑天份，她說：「頭先行入嚟已經忍唔住……見到咁多……係睇住我哋成長，唔係話你哋年紀大（全場爆笑），即係睇住我哋由認識、拍拖、猶豫要唔要拍拖、地下情嘅弟兄姊妹。」她又謂：「亦都好多謝你（祖藍）啦，揀選咗我。」祖藍立即「吓」了聲，全場即時起哄。祖藍說：「咁客氣呀，會唔會係我講呢句說話，大家咁話啦。」亞男回應：「咁你都真係好好嘅，係無價寶嚟㗎。」祖藍話：「畀面啦。」她自讚父母教到自己咁好和好靚，認真搞笑。
【大騷婚戒】
【餅印母子】
祖藍和媽媽如餅印般，十分搞笑。
《新浪娛樂》圖片
【父拖進場】
亞男由爸爸帶領入場，親友齊齊站立拍掌及影相。
【陣容鼎盛】
兄弟姊妹團由多位藝人組成，有鍾嘉欣、苟芸慧等索爆花旦撐場。
老婆勁讚靚仔有才華
儀式完畢後，一眾賓客在backdrop前影相留念，祖藍同亞男應記者要求錫足四次。受訪時祖藍直認好激動：「佢都有喊，隔住頭紗睇唔到啫。我平時嘻嘻哈哈冇爆出嚟啫，呢個地方好特別，睇住我大，每一個親友都好warm、好窩心。」二人透露未計劃生BB，晚上兩家人會分別食飯做節，而一對新人就要過二人世界，祖藍說：「婚後第一個情人節大晒，多謝獎門人幫我哋搞掂晒，會去佢間西餐廳食飯。」問到會送甚麼禮物？祖藍說：「聽日先講你聽，乜都冇，冇晒錢。」亞男甜絲絲搭嘴：「唔需要禮物都好開心。」祖藍笑說：「成日都喺人面前讚我。」亞男說：「今日已經讚得少，我成日都話佢靚仔有才華。」二人今日將於迪士尼樂園擺酒，再度狂歡。
採訪：藍文浩
攝影：仇志德
from:
http://hk.apple.nextmedia ... 150215/19042456
