方中信口中肥到似生蟲的女友莫可欣，原來已懷孕三個多月，今年六月鼠B 將會誕生。
意外有喜，莫可欣形容，方中信知道就快做人老豆，居然用咗兩個星期時間接受現實。
據了解，莫可欣珠胎暗結連經手人方中信都隱瞞，直到喜訊見報，各方好友致電祝賀，準老豆語帶無奈話：「我都唔係知早你好多日！」
無心理準備做老豆，方中信在聖誕節前夕才豪fing 十三萬八，買下大馬力電單車代步，同一日，記者致電他求證喜訊時，更換來一個「妖」字！
老婆唔嫩，但仔細，無理由仲學人風馳電掣玩電單車，若非大肚事件瞞天過海大受刺激，從來無諗過要下一代的方中信，應該有產前抑鬱症。
聖誕禮物
上星期平安夜（十二月廿四日）黃昏五點，方中信獨自由西貢匡湖居出發，乘的士到新蒲崗，手執電單車頭盔的他，下車後便走入奧地利電單車牌子KTM 專門店。
當日原來是方中信的新寵、KTM 的○七年新款Super Duke 990終於空運到港，豪花十三萬八千的聖誕禮物，方中信急不及待去嗱車，更以車主優惠價八折，使多二千四百元買下KTM 皮褸即著，與新歡襯到絕離開，不失「港版李察基爾」型佬稱號。
瞞天過海
就快做人老豆，還沉迷皮包鐵風馳電掣，相信與莫可欣隱瞞大肚事件不無關係。
據二人身邊好友所講，方中信從來無打算生兒育女。「佢哋一向有養狗，所以無諗過有BB ，加上方中信認為依家世界唔好，唔想小朋友將來受苦，寧願唔生，再講，如果想要BB ，都唔會等十二年先要喇。佢女友都同自己啲朋友講過，知道個男人唔想生，所以逼唔嚟！」知情者說。
無心插柳，莫可欣三十八歲先「中招」，明知枕邊人唔想有下一代，於是藉詞冬天胃口好，食到肥腫難分，盡量將大肚一事瞞得就瞞。
即使被記者多番追問肚谷谷是否有喜，莫可欣依然死撐：「呢排無乜運動，又食多咗，男友都笑我肥到似生蟲。」務求珠胎暗結一事，愈遲穿煲愈好。
拒絕回應
方中信買完電單車翌日，本刊發現大肚婆莫可欣，獨自駕住平治新車，到何文田街一住宅大廈。
全無化妝、面色灰黃的莫可欣，由於穿上厚身衣服，除了水桶腰比較明顯，實在難以察覺有了身孕。
同一日，本刊致電方中信求證有關喜訊，助手將問題轉告身邊的方中信時，他竟大大聲地「妖！」了一聲，便拒絕回答所有問題。
或許大肚一事，記者比他還早一步知道。星期日（十二月三十日），先斬後奏的莫可欣終於戲劇性向報章承認有喜，大批好友致電祝賀時，方中信老實不客氣說：「我都唔係知早你好多日。」嚇得好友們不知如何對答。
現年四十四歲，原名「符力」的方中信，是符家的嫡子，莫可欣替符家繼後香燈，原本可喜可賀，但自己做咗人老豆，逼到埋牆角先知道，呢份○八年賀禮，準老豆應該麻麻哋歡喜。
最醜港姐
現年三十八歲的莫可欣，自九三年成為港姐冠軍後，至今一直被外界喻為歷屆「最醜港姐」。幾醜都好，最緊要命好。九五年，莫可欣居然搞掂「港版李察基爾」方中信，令唔少人大跌眼鏡，一致認為，莫可欣執到寶。
二人拍拖十二年，雖然成日鬧交，方中信更曾公開數臭女友只係顧住打麻雀，但感情依然穩定，雙方更少有傳出緋聞。今次莫可欣大肚，令從來無諗過結婚生仔的方中信陣腳大亂，有記者問他BB 出世後會否擺結婚喜酒時，方中信竟然話：「拍完嘢得閒咪結囉！」
正版李察基爾都有個仔仔Homer 啦，方中信做人老豆都唔過分啫！
方中信與莫可欣同樣愛潛水，更經常到處探索海底世界，兩人嗜好相同，正好用來維繫感情。
嗱住頭盔、著上粉紅色衞衣嗱車的方中信，嫌未夠有型，即場買埋件電單車皮褸，同愛車襯到絕。
24/12/075:30pm
電單車做聖誕禮物，未來老婆莫可欣無福消受。
