有老婆，又有兩個仔的黃秋生一向當老婆無到，爛滾爛蒲；尤其近年修身成功後，身邊女伴更轉個不停，不過通通短炒無下聞，老婆吳惠貞亦一直隻眼開隻眼閉。
但自從黃秋生搭上家住上水的辣模Jessie Cheung 後，夫妻關係便開始起變化。兩人越玩越認真，男方經常大模廝樣拖住女方周圍去，Jessie 更如女主人般於黃秋生大坑道寓所自出自入。提到這段不倫戀，Jessie 大方說：「而家同佢一齊好開心。」擺明車馬。
二奶要坐正，正印自然忍無可忍。一向唔出聲的吳惠貞已正式與黃秋生離婚，並準備帶埋兩個寶貝仔移居加拿大，免得眼冤。
攞正牌攬女
已經四十六歲的黃秋生，踏入中年後越玩越喪，除了「辣＊」唔少圈中姐仔，更不時被拍下與妙齡少女拖手行街。
每次被捉偷食，他依然淡定，完全唔使俾面老婆，亦懶理外界指責。○五年，他更以「費事俾人跟」的理由，與太太分開住，一支公住在大坑的他當然不愁寂寞，常被拍得深宵夜蒲攬女。
繼同孟廣美、范冰冰及李蘢怡傳緋聞之後，今年年初，黃秋生被發現與廿四歲模特兒Jessie Cheung （張詩敏）睇拳賽，老友吳鎮宇及張家輝亦在場。面對記者鏡頭，二人依然無避忌，又摸又攬，非常痴纏。
據知二人是於去年十一月在灣仔的Penthouse Sky Lounge 認識，旋即打得火熱。黃秋生在朋友間曾大讚對方靚女、有內涵又傾到偈，○七年被影到拖Jessie 睇拳賽時，在友人間公開戀事外，更向記者表示與Jessie 拍拖。
雖然被指「大滾友」、「背妻偷食」，但黃秋生完全唔介意，不斷約會新歡。今年五月「Jacob&Co.」在港搞派對，兩人公然大跳辣身舞。
黃秋生如此大膽，原來早已攞正牌。「佢上年（○六年）已經同老婆搞好手續離婚，所以咪咁大膽拖Jessie 出嚟囉！其實幾年前佢同老婆感情已經麻麻，分開住之後又傳咗咁多緋聞，佢老婆頂唔順，上年正式同佢離婚。」黃秋生身邊人說。
明明同老婆搞分居離婚，被拍到拖女又唔否認婚外情，年初卻被拍下同老婆仔仔一家大細行商場，原來黃秋生擔心兩個寶貝仔無法接受現實，故一直唔願公開已離婚。
「佢好錫兩個仔，擔心佢哋唔開心，出面記者點寫佢反而唔理，最緊要兩個仔開心。」知情者說。
拖新歡開工
事實上，吳惠貞之所以主動結束夫婦關係，全因黃秋生對於新歡Jessie 的女友地位極之公開，除經常拖她出席好朋友的聚會外，每次出外工作，都會自己俾錢，包機票食宿讓女友同行。今年二月，黃秋生在台灣拍攝《不能說的秘密》時，Jessie 便飛往台北探班，兩人十指緊扣行敦南誠品CD 鋪。六月，黃秋生去上海拍攝《老港正傳》，Jessie 亦有同行，片廠內的工作人員都知她是黃秋生的女朋友，戀情白熱化。
二奶越踩越埋，黃太最終決定辦離婚手續，不再留戀黃太虛名。「佢哋○五年分居之後，黃秋生就不停被雜誌影到攬女，後來搭上咗Jessie 仲離譜，愈嚟愈公開，佢（吳惠貞）愈睇愈眼火爆，上年嗱嗱聲搞埋啲手續離婚。賣埋以前喺太古城層樓，賺到啲錢，帶埋兩個仔去加拿大住，九月就會起行。」吳惠貞的友人說。
冇錢冇所謂
最近黃秋生不在港，無拖拍的Jessie 週二（七月卅一日）下午獨個兒去銅鑼灣時代廣場行街。記者上前問她男友離婚一事，她表現怕醜。「我唔知，你問番佢（黃秋生）喇！（咁你依家同佢（黃秋生）開唔開心？）都OK 。（佢老婆移民喎？）唔知吖！你問佢喇！」據Jessie 身邊的好友透露，她十分享受與風流成性的黃秋生拍拖。「佢成日話男朋友對佢同屋企人好好，好識氹佢開心，雖然黃秋生大佢廿幾年，但Jessie 一啲都唔介意，仲話佢一啲都唔似出面啲人講咁火爆，係一個好細心嘅人，同佢一齊冇錢都無所謂。之前Jessie 同佢暗示過想買車，秋生側側膊唔買，點知Jessie 都冇詐形，真係蠢到死。」
記者亦曾聯絡黃秋生，求證離婚一事，但由於他身在海外，至截稿前仍未聯絡上。
黃秋生兩個寶貝仔一個八歲，一個十一歲，他離婚一事遲遲未公開，亦是因為擔心小朋友的感受。
屋邨辣妹
現年廿四歲的張詩敏（Jessie ），曾就讀上水官立中學，家住上水天平。
樣貌鬼鬼哋的她工作量不多，只間中替雜誌影硬照。雖然在模特兒界知名度不高，但憑着32C 、24、35的辣身材，加上性格開放，在明星蒲界甚吃得開。
早前她便在Friendster 國際交友網站，公開大堆自拍的性感比堅尼照及與多名圈中男星，包括鈴木仁、黃家諾及張耀揚等夜蒲時的親暱合照。但私相簿被雜誌公開後，Jessie 已急急把相簿封鎖，只在Friendster 公開一張個人硬照。
愈滾愈後生
雖然黃秋生外表麻甩，但年過四十依然keep 到好弗，近年打扮愈趨後生的他，緋聞不絕，而且女伴更愈來愈年輕化。
○四年 被踢爆在中環夜會孟廣美，更被拍下拖手依偎的照片。
○五年 返內地拍攝劇集《八大豪俠》期間，被指搭上比他年輕20年的內地當紅花旦范冰冰。
○六年 與李蘢怡在萬聖節派對中合跳Salsa 舞後，旋即傳出緋聞。
○七年二月 拖實模特兒Jessie ，偕好友吳鎮宇及張家輝一同睇拳賽，兩人全程甜蜜說笑，女方睇到興起，更用手捽男方的下巴。
○七年四月 黃秋生在「香港特區十周年電影選舉」中罕有地多謝太太顧住頭家，轉頭出席電影《寄生人》的首映禮後，即夜會一名貌似朱慧敏的年輕女伴食意大利菜，然後再到灣仔蒲吧兩粒鐘，兩人更在車廂纏綿，秋生被女方箍頸啜嘴，態度親暱。
黃秋生出外拍戲，Jessie 亦會前往探班，今年二月，兩人十指緊扣行台北敦南誠品書店，戀情更加肯定。（《忽然1周》圖片）
廿四歲的Jessie 身材惹火，有樣有身材，難怪黃秋生如此o答糖。（《忽然1周》圖片）
黃秋生與吳惠貞九五年結婚，但兩公婆鮮有一同公開露面，○四年，二人罕有地拖手睇歌劇。（《蘋果日報》圖片）
○五年，黃秋生以維護家人私隱為理由，獨自搬大坑道住，實情是同太太分居搞離婚。（《蘋果日報》圖片）
