黃秋生指自己「冇熱氣」不用飲王老吉，又稱與王晶（小圖）沒有來往。資料圖片
現年55歲的黃秋生縱橫影視圈逾30年，曾兩度奪得香港金像獎影帝，一向敢言的他，前晚在facebook用99字爆粗狂轟：「我X你啦王老吉（某七人花名），你X味係你話我病成咁叫人唔好用我，係文雋同劉強話唔好咋。屎忽鬼！部戲關你X事咩？嘉禾嘅，你㗎……」有網友追問發生甚麼事？秋生留言爆大鑊：「睇到段王晶講嘅嘢，講到自己幾大仁大義。人哋嘅功勞當自己嘅。」
「叫人唔好用我」
記者昨致電秋生，問到「王老吉」是否王晶？事隔一晚平息怒火的他說：「我又冇指名道姓，自己發吓爛渣發吓脾氣，亦都無謂亦唔想引起紛爭。」98年秋生因甲狀腺問題服類固醇，令體重增至208磅，當年拍電影《風雲：雄霸天下》演劍聖，由劉偉強執導，監製及編劇是文雋。
黃秋生前晚在facebook用99字爆粗狂轟王晶。
黃秋生直認事件與《風雲》有關。劇照
問此事是否跟《風雲》有關？秋生直認：「應該係，因為睇到段嘢，功勞自己領，但其實唔關佢事，而且我聽聞當日係佢叫人唔好用我，仲有話個造型，人哋根本原裝漫畫係咁，佢當人哋馬榮成死㗎？話係佢自己諗喎，邊有人講嘢講到咁衰格。」
秋生踢爆幾乎被「王老吉」打爛飯碗：「某人話我腫成咁唔好用我，但劉偉強堅持話唔好，雖然戲份唔多，但對我都係好大鼓勵，所以咁多年我對好朋友心存感激。」問到跟王晶是否仍有來往？秋生諷刺說：「點會有來往？我都冇乜熱氣，唔使飲王老吉。」
講明死都記得
不吐不快的秋生大爆曾被「王老吉」當面羞辱：「有次首映走埋去打招呼：『最近點呀，有乜嘢撈呀？』佢兜口兜面大庭廣眾：『撈泥啦你！』我真係死都記得！嗰陣唔掂，雖然話有嘢畀你做，但以工作嚟講，係應該對等地位，唔係你搵人做，就可以叫人食屎撈泥！」
此外，王晶昨跟好友陳百祥現身沙田馬場，為「太陽旺旺」在第六場勝出拉頭馬，對於被秋生揞名鬧爆，王晶透過經理人表示沒回應，劉偉強則於截稿前未有回覆。
採訪：鍾國仁、何永寧
攝影：譚日華
from:
http://hk.apple.nextmedia ... 170710/20084251
