有高層余詠珊撐腰，黃翠如由有線娛樂台記者仔，變成無綫一線花旦。極速上位，可惜黃翠如演技未達女一標準，一眾監製幕後員工早就睇唔過眼。
你有你不滿，余詠珊話知你，最近更夾硬踢走呂慧儀、莊思敏兩位高妹，安排黃翠如插隊做《燭光晚餐》嘉賓，最後驚動主持之一的黃秋生，親自踢走翠如BB。
演技唔掂余詠珊近年在無綫的勢力版圖日漸擴大，令黃翠如、洪永城及陸浩明等昔日有線愛將，過檔後水鬼陞城隍，當中以翠如BB得寵指數最高，一劇接一劇，套套擔正做女一，多得余詠珊背後努力發功，幫愛將爭取好劇本、好角色。
雖然有高層幫手開路上位，可惜翠如BB演技火候未到家，像去年擔正劇集《師父，明白了》，浮誇演出遭網民狂插之餘，連劇組監製對翠如BB的BB演技，同樣早有微言。
唔單只谷愛將拍劇，余詠珊最近仲睇中黃秋生與黎芷珊合作的清談節目《燭光晚餐》，下令踢走原定呂慧儀加莊思敏兩位高妹做嘉賓的一集，安排翠如BB打尖頂替，並以「BB」由來做節目話題。
據悉從不逆來順受的黃秋生，對被人「塞」佢食BB極之反感，最後以「內容空泛」為由，違抗高層聖旨。
由秋生做主導嘅《燭光晚餐》，每次同嘉賓吹水都言之有物，且笑位甚多。
有傳黃秋生為保住老友呂慧儀同莊思敏做節目嘉賓，抗旨彈走生插的黃翠如。
拒B要詩
早前播完的《食為奴》，何雁詩的重飛角色，原本最初也被高層下旨，要翠如BB飾演，但最後監製抗令，堅持沿用新人。
監製反抗黃秋生落閘，但余詠珊未有放棄。「秋生say no，話要番呂慧儀同莊思敏，因為佢覺得兩個高妹轉數快，傾偈有火花。但上頭唔理，想照塞黃翠如入嚟。好在秋生有番咁上下牙力，一再強調對BB呢個話題冇興趣，企硬話唔做，搞到余詠珊都冇佢符。」知情者說。
唔只被黃秋生「彈鐘」，據悉去年底劇集《食為奴》揀蟀期間，監製黃偉聲亦拒用翠如BB做女主角。「當時《食為奴》第一批主角林峯、吳卓羲、陳法拉度唔到期拍，最後換咗王祖藍孭飛，有人見大好時機，於是逼監製用翠如BB，但個角色根本唔啱佢，最後監製寧願揀未拍過劇嘅「巨聲幫」何雁詩，再搭萬綺雯，點都唔肯就範。」知情者續說。
對於彈走翠如BB，黃秋生好坦白：「因為我冇經驗做訪問，所以訪問熟人比較容易啲。同埋佢哋覺得BB呢個話題可以講，但我真係唔知BB點可以講到成個鐘。」
入無綫前，翠如BB只是有線主持一名，當過一套電影《奪標》女主角，其餘均做大茄。直至年前入無綫，她火速由妹仔變花旦。
03年《師父·明白了》第一女主角
03年《心路GPS》第二女主角
04年《愛我請留言》第一女主角
04年《舌劍上的公堂》第二女主角
冧爆陳凱琳
對BB無興趣，但上週日（3月23日）剛播出的《燭光晚餐》，黃秋生對住「民選港姐」陳凱琳明顯冧爆，讚對方口齒伶俐之餘，得知她英文名叫Grace後，直指名字唔襯佢，即場為她改名Natalie，成為秋生對陳凱琳的御用暱稱。
撰文、
