投資有道的薛家燕，一直主張「有錢一定要買磚頭」，多年來在物業市場上獲利甚豐，至今手持七個物業，全部有升無跌，總市值過億元。由於現時住宅樓價高企，她轉而睇好工廈市場，尤其是觀塘區，更大方地與讀者分享其累積經年的投資買樓心得。
不過，始終炒樓睇時勢，諗頭多多的家燕姐，亦同步開拓商機，繼○四年一手創立「家燕媽媽藝術中心」後，她剛於早前又斥資七位數字推出自家製的「家燕媽媽曲奇」。日前，她更親身到餅店做生招牌推銷，果然力不到不為財。
主張搵到錢便買「磚頭」的家燕姐，雖然已手持多個物業，有樓收租，但她仍不斷創業，近日又擲百萬創立自家品牌曲奇餅，準備將來可傳承給子女。日前，她更快閃落舖做店長，落手打點一切。
睇好工廈薛家燕自小受父母薰陶「買磚頭保值」，當年六、七十年代，其第一個物業都是由父母代為購買，從而開始留意樓市，又加入炒樓行列，高峰期持貨一個月已大有斬獲，但當中亦曾買「縮水樓上舖」，導致損手二百多萬離場。
縱橫樓市多年的家燕姐，日前便毫不吝嗇地與讀者分享其投資心得，她自爆去年曾睇過海怡半島的兩個九百幾呎的單位，自覺有升值空間，但後來因忙於拍劇，未有跟進而「走寶」；結果港鐵通車後，該樓價火速升了幾百萬。對於揀豪宅，她主張要睇校網，並對半山的西摩道和干德道情有獨鍾，「有個高人話要有靠山，我咪揀太平山下，八十年代買西摩道嘅香港花園，二千幾呎連四個車位先一百八十萬，後來升到幾千萬，不過唔係我買，係我前夫賺咗。至於揀校網，因為佢抗跌能力高。」不過，現時住宅樓價過高，她反而睇好工廈潛力十足，指市場需求大，「工廈呎數大、樓底高，實用面積好似大好多，我會揀大街，上落貨方便，我首選觀塘，因為好多從事娛樂事業都係喺呢區發展。」她強調買物業一定要睇清條款、銀行估值，以及親身到場視察，不能盲目，最重要是量力而為。
為食的家燕姐，工作中忍不住偷食當試味。
家燕姐主動出擊請一班年輕男顧客試食，並細心聆聽他們的食後感及收集意見，從而再作檢討。
