繼羅嘉良答應捱義氣返港撐台慶，到最後無綫為縮皮，臨門將他彈鐘後，近日再次發生臨門被飛事件。據悉自由身的陳國邦俾大台說回巢拍《包青天》，開工做晒前期功夫，點知高層一個唔like佢現身ViuTV，即時踢佢出局，連《公公出埠》都out走，對大台作風失望的陳國邦：「唔好呼之則來，揮之則去。」
對歷史有研究，又拍唔少古裝劇的阿邦，得監製邀拍《包青天》，做了一輪準備功夫，最後被飛。
大台變「方丈」，唔俾陳國邦參演《公公出埠》，最後五個變四個去布吉拍攝。
上月大台節目巡禮，曹永廉同黃浩然已爆將與陳國邦等五個大太監，齊腳拍旅遊節目《公公出埠》。
鎖定阿邦演公孫策
數月前，無綫籌備重拍相隔二十二年的經典劇《包青天》，男女主角亦敲定，由狄龍兒子譚俊彥接爸爸棒，演深入民心的「包青天」，至於左右手「展昭」及「公孫策」，分別由上緊位的張振朗，及現是自由身的陳國邦孭飛，雖未正式向外公布，但劇組已找三位拍板男主角為前期工作開工。
「監製知道『公孫策』角色唔係一般演員可以handle，所以一早捉住經驗夠嘅阿邦傾劇本由佢演。一五年就算佢離巢時寫咗封公開信俾公司，依然可以返去拍《八時入席》，因為好多監製知道阿邦有料。」幕後人員透露。
重拍《包青天》，原是陳國邦演「公孫策」，張振朗演「展昭」。
譚俊彥接老豆狄龍棒，演經典角色「包青天」。
為《包》劇請假推job
今年九月，陳國邦處理新劇合約同時，已為《包青天》埋位試造型，又與同劇主角影埋TVB年曆海報。在浸大教戲劇的他，為十二月專心開劇，除向學校請定假，還推掉其他搵錢job。
早前羅嘉良答應捱義氣撐台慶，犧牲慶祝阿仔正日生日，點知最後無綫一句：「依家唔使嘞！」氣得羅嘉良開口炮轟。
自由身的陳國邦拍完ViuTV劇集，十月現身該台節目巡禮，但卻被大台視為「死罪」。
自由身拍Viu變罪人
豈料十月尾大台有高層一句唔like，將陳國邦飛出劇，連帶原本原班人馬，五個太監拍的重頭旅遊節目《公公出埠》，陳國邦都被踢出局。有指幕後人員收到上層通知，陳國邦的「罪名」，是早前拍了ViuTV新劇《身後事務所》，引來某高層不滿。但一直自由身的他，過去兩年都曾為其他電視台，如奇妙電視拍過親子節目《冇大冇細》，但當時大台冇「方丈」上身。
「當初搵阿邦拍《包青天》時，其實阿邦有同佢哋講拍緊ViuTV劇，十月完成，當時監製話冇問題，開晒會拍板用阿邦。點知有高層見到阿邦之後現身ViuTV節目巡禮，唔理阿邦係自由身，一句唔like要換人。啱啱搵咗人頂阿邦個位，不過佢哋好保密，想冚住件事，唔俾人知咁樣換走人。」幕後人員續說。
年初陳國邦也為奇妙電視拍親子節目，大台沒下封殺令。
無約在身，陳國邦除在浸大教書，亦忙於拍舞台劇，故一有時間，他必陪伴妻女。早前一家三口遊西貢。
15年阿邦決定離巢時，寫了「給無綫的公開信」，出信後數天他接到無綫電話，被邀與毛舜筠拍處境劇《八時入席》。
陳國邦對高層處理失望
「冇人同我交代」
對於搞晒造型，影埋海報，都臨門一腳被大台飛，陳國邦承認此事，而且至今大台冇人直接找他交代始末。「佢哋冇通知我，只係通知我經理人公司。但無論聽古仔、搞造型、影埋月曆，做嘢嗰個係我，唔知點解冇人同我交代。」
「唔明有咩牴觸」
至於「死因」是否上月他拍了ViuTV劇集，陳國邦覺得若然屬實，更大惑不解。「聽經理人講，TVB話係呢個原因。件事個轉捩點係我出席咗ViuTV個劇集宣傳。作為一個演員，拍完劇係有責任完成埋個宣傳，再者我唔係合約演員，點解限制我哋工作。佢哋同我經理人講，話驚到時兩個劇同步出街會影響收視。依家明明宣傳話My TV用戶超過三百幾萬，咁即係睇電視習慣已經由坐定定準時收看，改為彈性網上收睇，咁似乎唔關怕同步出街，加上《包青天》拍攝歷時五個月，加埋後期，出得街都要一年後，但Viu個劇上月已拍好，我諗唔明有咩牴觸。」
「可唔可以俾番尊重演員」
令陳國邦失望的，並非因為失去演出機會，而是與大台合作廿年，對今日某高層的處理，感到演員不被尊重。「呢件事上我冇乜太大情緒，失望當然有，其實用唔用陳國邦唔係好大問題，因為換角係經常發生嘅事，而係成件事過程唔係一兩日發生嘅嘢，由傾劇本，到造型，影月曆，相信TVB高層同整個製作團隊，唔會唔認同下進行，點解由覺得適合我做變為唔適合。
我想藉呢個機會，向部分明白事理嘅高層講，今次成件事由邀請我演『公孫策』，或安排拍《公公出埠》，中間係做咗好多嘢同付出，之前同祥仔、蕭正楠佢哋坐埋度橋，亦向浸大請假，為咗《包青天》我推咗兩個一月同二月嘅工作，因為同時間唔可以拍其他嘢，個付出唔係話取消就取消，究竟有冇尊重過演員，TVB成日話演員係你哋好重要嘅資產，又係行頭大哥，咁可唔可以俾啲尊重演員呢，唔好呼之則來揮之則去。」
撰文：娛樂組
試晒造型，拍包青天陳國邦臨門被飛
