今年無綫台慶頒獎禮首次以一人一票方式投票，但仍惹來很多爭議聲。有傳黎耀祥和楊怡以加簽合約換視帝、視后寶座，而失落最佳男配角的陳國邦因不續約失獎，阿邦昨日心甘命抵說：「你簽約有人工加，唔簽就冇，好正常啫。」
無綫《萬千星輝頒獎典禮2012》圓滿結束，不過本報收到有人爆料指，黎耀祥三奪視帝，全因與無綫加簽三年合約；出爐視后楊怡亦向公司表明，若拿不到視后，便不加簽經理人合約。
有人質疑今年的出爐視帝黎耀祥和視后楊怡，是以約換獎。陳國邦話古明華得獎佢冇唔服，因為大家係好兄弟，反而覺得有約有獎好合理，輸得心甘命抵。
「可能覺得我癲」
據悉祥仔於年頭確實與無綫加簽了三年合約，他昨日在電話訪問中承認：「幾好笑，份約我年頭簽，當時因為王維基撬人，所以無綫加薪留人，都冇話畀獎我。」祥仔力撐一人一票選舉制公平：「以我所知，監票制度好嚴謹，每日有十個人輪流看住，只有余詠珊可以入去。加上每次登入投票都有廣告睇，要有公信力，唔係點同廣告商交代。」
陳國邦被讚在《大太監》演彭三順到位出色，可惜最終敗給同門師弟古明華，一段失獎後留言在社交網站都有四萬多人like爆。有指古明華一口氣跟無綫簽了五年經理人合約，而阿邦因行拖字訣，最終落敗收場。阿邦昨日在電話訪問中承認頒獎禮是小圈子遊戲：「你簽約有人工加，唔簽就冇，好正常啫。呢個係公司頒獎典禮，如果有衝突之下，畀一個對公司利益最大嘅人無可厚非。可能有人覺得我癲，做乜咁講嘢！」不過阿邦覺得民選視帝、視后及最佳劇集是一個好開始，寄望將來可以全面開放其他候選名單，問可會過檔簽王維基？他說：「我同無綫仲有一年合約，唔想咁快簽（無綫），諗吓先。」
諷刺造馬聲不絕
昨日無綫官方刊物《TVB周刊》前出版人舒展超在微博諷刺頒獎禮造馬，他寫道：「香港人其實很幼稚很好騙，給你來個《天與地》得獎，大家就以為這次真是一人一票沒有造馬？Please……」他直言「傑出演員大獎」擺明是用來留人的獎項，笑言得獎者要多謝王維基。
