陳國邦於《大太監》中的彭三順一角爆出，不過卻失落於上年台慶頒獎禮，前晚他與太太羅敏莊（Mimi）錄影節目時，Mimi大呻老公今年年尾滿約，但無綫還未與他傾續約事宜，坦言不覺得公司重用他。
陳國邦打算留守無綫，羅敏莊卻有意離巢發展
陳國邦、羅敏莊前晚以夫妻檔，與林盛斌（Bob）兩夫婦為曾華倩主持的無綫節目《滿fun情趣鬥登對》錄影。產後復工的Mimi回復苗條身形，她笑言今次出席活動是要還show，更透露與無綫合約八月中完結，正考慮會否續約。
嫌人多萌退意
不過她的丈夫國邦上年失落於台慶「最佳男配角」獎項，Mimi坦言與對方的工作是分開的，但她似有不滿的表示：「佢今年年尾約滿，不過公司未搵佢續約，除非驚佢走先會早啲搵佢傾，都唔覺公司重用佢。」記者問Mimi會否續約無綫時，她又不諱言：「呢度太多人，應該唔會簽。（過檔王維基？）佢嗰邊都好多人。（少人得亞視！）我都想去上吓堂，聽吓花姐（宮雪花）講嘢。」
之後記者訪問國邦，他表示如無意外，都會續約無綫，但問到續約條件，他無奈的謂：「冇乜期望。（咁灰？）唔係灰，又唔係啱啱入行，自己都希望可以做到黎耀祥佢哋咁，不過我等咗20年先等到彭三順呢個角色，下一個好角色唔知會唔會廿年後先出現。（咁續約條件？）呢啲無得傾o架！」
甘草等到凋謝
國邦又不諱言王維基都找過他，說到大陸發展，他又謂：「以前冇諗過，但生咗個女之後，老婆都有此諗法，我就緊守崗位。」之後在旁的Mimi笑老公謂：「佢好甘草o架！」國邦即謂：「我係甘草都謝啦！」
此外，Mimi又指女兒出世後，老公性格大變，猶如開籠雀般，問會否呷女兒醋，Mimi笑謂：「唔會，多條女幫我頂吓囉！有時佢都好難頂o架！」
From:
http://orientaldaily.on.cc/cnt/e ...0125/00282_032.html
