近期人氣爆燈的「彭三順」陳國邦與「蘇基」古明華在無綫頒獎禮的「最佳男配角」爭崩頭，氣勢叮噹馬頭！在娛圈默默拚搏廿多年的二人坦言過去甚心酸，除受盡白眼，更想過退出，不過今年終於熬出頭，獲觀眾Like爆，兩人均表示有信心，實行「太監」鬥「蘇基」！
今屆《萬千星輝頒獎典禮》的「最佳男配角」獎競爭激烈，同是演藝學院出身的師兄弟「彭三順」陳國邦與「蘇基」古明華（古佬）終於熬出頭來，獲大批網民力撐成大熱，連國際巨星周潤發亦點名讚好，兩人實力旗鼓相當！
陳國邦表示若得獎會和老婆囡囡一齊慶祝。古佬一直默默耕耘，曾遭人白眼，如今憑「蘇基」吐氣揚眉。
攞獎墳前祭母
年中憑《巴不得媽媽…》而人氣爆燈的古佬，昔日演繹三、四線小角色，最為人熟悉的是在電影《國產凌凌漆》中演放生周星馳的行刑官，在行內默默打滾廿二年，今年終憑「蘇基」姣爆演技討好觀眾，但他坦言有人曾向他一沉百踩，不過樂觀的古佬說：「公司好多三十、四十歲嘅人多年來都默默耕耘，即使紅咗都唔會踩人。當然亦有人對我寬容咗，呢個係社會同人嘅自然反應。」
早前他先拔頭籌，在馬來西亞「Astro頒獎典禮」奪得「我的最愛出位人氣王」，問到可有信心在無綫頒獎禮再下一城？他說：「有信心，但唔代表有機會攞，入行廿二年，咁多年都冇計較成果，點解依家要計較呢？」談到亡母對他入娛圈萬分支持，古佬不禁流下男兒淚，並為亡母未能看到他走紅而感到遺憾：「如果攞到獎，我想去佢墳前同佢講：『阿媽，我終於得咗啦！』」
失敗學會放下
至於同樣入行廿多年的陳國邦亦後勁凌厲，年尾憑台慶劇《大太監》中爐火純青的演技成功入圍與古佬較量，近日更有傳將獲高層欽點奪「男配」。雖然他是眾所周知的好戲之人，不過一直未獲賞識擔大旗，令陳國邦做得有點心灰意冷，六、七年前更想過退出娛圈！
曾提名金馬獎及金像獎「最佳男配角」的他表示，失敗過學識放低，他說：「以前得失睇得好重，但依家唔會，我會提醒自己點解熱愛做戲、同餬到口就得。」陳國邦直言今年對攞獎多了幻想：「如果得到獎，第一時間想同老婆、囡囡食飯慶祝，但到時一定會畀劇組拉去慶功。」
