「十優港姐」麥明詩（Louisa）與林作拍拖兩年多，早前有指林媽媽買豪宅讓兩人結婚用，想不到林作竟趁女友返深圳拍劇時作反！昨日凌晨讀者鍾先生透過本報爆相爆片，分享幾張林作在銅鑼灣街頭向低胸索女「A貨麥明詩」攞電話的照片，麥明詩昨在電話語帶雙關說：「關係講信任，要𥄫住嘅話冇意思。」而林作昨晚在Ig貼上本報報導他媾女新聞的截圖，並留言：「大鑊！」似乎被女友「問罪」了！
現年24歲的麥明詩自從選擇簽約無線後，工作量倍增，2月去完英國拍攝《星星探親團》，最近又返深圳拍無線新劇，不過她每次離港，男友林作似乎都會「作怪」。繼2月林作被影到相約三女冒雨夜蒲蘭桂坊後，昨日讀者鍾先生透過本報爆相爆片，提供幾張林作疑媾女的短片，林作大狀一貫官仔骨骨look，拿住手機面向穿白色低胸小背心的「A貨麥明詩」，其間兩人竊竊私語，不自覺地頭貼頭，越挨越近。
【孖住等車】
趁麥明詩不在港，林作一次又一次被影到夜蒲媾女。
【越挨越近】
林作與低胸索女細細聲傾偈，有機會拉近距離越講越埋。
齊上私家車離開
讀者鍾先生在電話中透露，昨日凌晨二時半在銅鑼灣耀華街，見到林作和貌似麥明詩的長髮索女一齊等車。兩人最初與約十名朋友在附近酒吧把酒談歡，離開時其他朋友分批上的士，最後只剩林作與索女，見林作不停撳電話，是否call車？鍾先生說：「唔係，當時我哋企喺個女仔隔籬，聽到男嘅問女攞電話，個女有啲尷尬。至於有冇畀我真係唔知。」不一會林作與索女便乘搭前來接載的私家車離開。
昨日林作被問是否約女仔去街時，他先在電話連聲大笑，再問他是否問女仔攞電話？林作說：「冇攞電話，留學時期識佢，Louisa都識，friend嚟㗎，嗰架係我call嘅Uber，唔係我司機。」為何只載該名索女？林作解釋：「因為另外兩位女士畀咗另一位靚仔架車載走咗。」林作表示有預先通知女友外出，但問到可擔心女友呷醋而減少夜蒲？他聲線突然越講越沉：「如果要作古仔，咁就真係要解一解喇，都唔可以……係……哈！有啲驚㗎都。」
前晚林作在Ig只貼與男友人合照。
麥明詩（左）近日離港北上拍劇，造就男友作反媾女。互聯網圖片
麥明詩上月難得留港一天，即陪男友去踢波，實行做跟得女友。
「十優港姐」麥明詩與林作拍拖兩年多。
避嫌唔貼女仔相
其實林作前晚確實有自貼相片上Ig，不過只是清一色男士，他與兩男性友人一齊飲紅酒兼打邊爐，飲到面紅紅，但未見與該名索女合照，亦沒有「下場」酒吧相，林作只留言：「兄弟明天註冊結婚，9月4行禮。你是我認識太久的同學，接新娘那天早上，希望你別怪我太輕佻。」昨晚7時許，林作再在Ig貼上本報報導他媾女新聞的截圖，留言說：「大鑊！」未知是否向女友解釋。
麥明詩昨以短訊回覆，避談男友有沒有預先通知有女仔在場，她說：「平時唔會check住佢，亦唔需要時刻報到，有正常社交生活好正常。關係講信任，要𥄫住嘅話冇意思。」不過麥明詩上月難得不用開工，即陪男友去球場踢波，實行做跟得女友「𥄫實啲」，免男友有女埋身。
採訪：嵐山
from:
http://hk.apple.nextmedia ... 160612/19650698
