現年25歲的麥明詩，15年當選成為「十優港姐」後，即獲無線力捧，不停拍劇兼狂接商場騷，又試過踩入電影圈，瓣數多多，加上同林作的緋聞，令佢keep住有新聞！
有十優狀元及劍橋畢業光環，美貌與智慧並重的麥明詩自然多人吼，自從撇甩林作後，keep住都有仔溝，最近《跨世代》就同余詠珊的愛將余德丞（Dickson）假戲真做，面對「巨胸小鮮肉」余德丞出盡冧招，麥明詩㗳哂糖，二人一撻即著。
拍拖食消夜
有無線戲劇部總監曾勵珍撐腰，麥明詩已經先後有機會參演兩齣重頭劇《賭王群英會》及《使徒行者2》，儘管演技麻麻，但形象入屋的她仍然大把機會，就連五十集台慶劇《誇世代》都指明要搵麥明詩，劇組仲刻意安排「巨胸小鮮肉」余德丞（Dickson）與她飾演情侶，促使二人火速撻著。
上月中，麥明詩同余德丞就現身銅鑼灣拍外景，身形健碩的余德丞以公主抱形式攬住赤腳嘅麥明詩通街跑，同「女神」有如此親密嘅接觸，余德丞當然把握機會，即使聽到導演嗌cut機，余德丞都未有即時放低麥明詩，麥明詩亦都配合地繼續攬實「巨胸」拍檔，仲含情脈脈望住男方，冧到余德丞暈得一陣陣！
麥明詩見余德丞攬到自己咁實，情不自禁含情望住對方，搞到余德丞暈得一陣陣，唔小心鬆一鬆手。
未正式埋位，麥明詩假戲真做將成個頭挨落余德丞40吋巨胸上。
拍攝一場打小人戲份，余德丞眼甘甘望住麥明詩赤裸的腳，好陶醉。
臨收工，麥明詩捉實余德丞諗橋撇甩劇組。
監製突然殺入二人對戲時光，余德丞慣性繼續搭住麥明詩膊頭。
麥明詩同林作關係欲斷難斷，林作俾麥明詩降呢為「朋友」。
拍劇幾乎日日對住，二人實行假戲真做，每次開工餘德丞都明顯對麥明詩照顧有加，日前他們在中環海濱旁的摩天輪拍外景，飾演情侶的二人繼續奉旨談情，未埋位時余德丞不停講爛gag氹「女神」，麥明詩亦顯得非常受落報以冧笑，其間二人行埋一邊對戲，麥明詩主動挨著男方四十吋巨胸，監製突然殺出講解劇情，余德丞繼續好順手搭著女方膊頭唔願放手，拍攝完在摩天輪車廂場口，劇組再轉移灣仔鵝頸橋開工，為咗盡快收工享受獨處時光，拍咗兩take就收貨！
撇甩劇組開餐
拍攝期間有空檔，二人夾埋撇甩劇組，扮前後腳離開，之後就再在附近會合，齊齊行去附近一間餐廳嘆日本料理，食足一粒鐘，離開餐廳時，麥明詩即指手畫腳向余德丞撒嬌想有下半場，余德丞當然聽命「女神」聖旨，陪實麥明詩去麥當勞食雪糕，主動俾錢order，仲一杯雪糕坐低兩份嘆，好曖昧。
戲外有下文
嘆完日本料理，麥明詩一離開餐廳即向余德丞撒嬌要求下場。
余德丞陪麥明詩到麥當勞食雪糕，仲一杯雪糕兩份嘆，so sweet。巴西種情緣
去年，麥明詩與余德丞孖住到巴西為無線擔任里約奧運外景主持，據知當時余德丞已經明顯對麥明詩嗒糖，不過就只係敢做隻「兵」默默守候。
「係人都睇得出余德丞好冧麥明詩，佢一對住麥明詩就會好似開籠雀，平時冇見佢講嘢咁好笑㗎，但一有麥明詩喺度就好似上咗身咁狂講笑話，喺巴西嗰陣又成日整色整水約麥明詩出去單獨食飯，有次麥明詩隨口嗌口渴，余德丞即刻九秒九請纓去買水俾佢飲，不過嗰陣佢似係做『兵』多啲囉，話曬嗰陣麥明詩仲同緊林作一齊吖嘛！我哋都有私底下笑佢㗎！佢死撐話唔係咋嘛！」工作人員透露。
去年，麥明詩與余德丞孖住到巴西為無線擔任奧運主持，當時男方已經mark實「女神」，經常大獻慇勤。
自從飛甩林作後，麥明詩即吸引唔少狂蜂浪蝶埋身，去年同何浩文合作的劇集《賭城群英會》兼《失戀日》，當時何浩文公開表示對麥明詩有好感，擺明向林作挑機。
15年當選成「十優港姐」後，麥明詩即獲無線力捧。「巨胸小鮮肉」
現年二十七歲的余德丞，香港城市大學工商管理學畢業，家人做生意，屬小康之家，入行前，是香港遊泳隊成員，曾任新城電台DJ，主持音樂及知訊台節目，13年加入無線，擔任TVB體育台主持，其後，搖身成為兒童台主持《Think Big天地》兒童節目；去年，開始涉足電視劇，有份客串電視劇《殭》及《幕後玩家》，擁有42吋巨胸而為人所認識，被譽為無線「小鮮肉」。
撰文：娛樂組
攝影、攝錄：楊紫、余一駱、蕭敬漁
