麥明詩噚日話希望推行電子收費，搭的士唔會再有爭拗。
麥明詩日前喺尖沙嘴搭的士去佐敦漾日居，畀的士司機喺facebook出post，話全程車資44.4元，找錢嗰陣，麥明詩冇收毫子。麥明詩前晚電話回覆話：「其實成程的士都好順利，冇任何拗撬，應該係其他藝人po過話的士司機唔找足，所以佢保障自己，話自己有找足零錢，係我自己話唔要零錢。」而王喜喺今年8月就出post講搭39.3元的士，不滿司機只找60元。
的士司機喺facebook貼圖，話麥明詩唔收毫子。
87歲嘅潘迪華（中）由麥明詩扶着上台領獎。
李家鼎獲頒飲食旅遊書獎項。
潘迪華勉勵港人
噚日麥明詩到鑽石山為閱讀頒獎禮任頒獎嘉賓，負責頒獎畀潘迪華、東方昇、伍家謙同李家鼎等，佢重提的士找贖事件：「有啲無奈，我覺得香港人特別鍾意對立，其實成個搭車過程我哋都冇爭拗。」麥明詩話平時都習慣咗找錢只要整數，但唔介意對方咁做，不過佢話：「希望下次唔使咁詳細講我個地址出嚟，如果可以早日推行電子收費，就唔使有呢啲爭拗啦。」
麥明詩喺活動分享話有諗過出書，不過暫時冇靈感，可能會寫娛樂圈題材，希望將來可以寫劇本。另外，現年87歲嘅潘迪華獲頒「最佳文史哲書」，台上講到發現時下香港人生活得唔開心，寄語年輕人多睇書，做好本份，多啲笑容。
撰文：馮仁昭
from:
http://hk.apple.nextmedia ... 170928/20165979
