舊年9月復出拍寫真嘅林雅詩（Grace），當時已經有傳佢同老公溫文英感情有變，Grace終要求離婚。噚日早上10點45分，已經單方面簽紙離婚嘅Grace，喺媽媽陪同下現身灣仔法院，同溫文英為囝囝嘅撫養權上庭。
林雅詩曾被影到帶囝囝行街。資料圖片
2005年林雅詩和溫文英慶祝囝囝滿月。
庭外嘈交
Grace喺庭外同溫文英有交談，其間聽到Grace大聲話：「得喇！你乜嘢態度呀？我做錯啲乜？」到下午1點左右，行出法院嘅Grace接受訪問，起先佢表現得好堅強，透露今日係第2次上庭，主要傾離婚同囝囝嘅撫養權。講到𠵱家嘅進展，Grace話：「全部嘢交咗畀律師處理，好多嘢唔方便透露。」但當問到係咪老公唔肯簽紙離婚時，佢忍唔住眼紅紅，講到撫養權誰屬時就話：「未知呀，要等律師再安排。」
冷靜咗幾秒之後，Grace再話：「因為佢做咗好多嘢，令我比較辛苦，所以等我處理好曬先同大家講。」至於係咪溫文英講咗啲難聽說話，令佢哋之前喺門口度嘈，Grace欲言又止，最後唔該完記者就離開。
撰文：馮仁昭
from:
http://hk.apple.nextmedia.com/entertainment/art/20160607/19643718
