去年因老公疑似出軌斷正，決心斬纜結束10年婚姻的林雅詩（Grace），回覆單身後一直努力工作賺錢，決意獨力撫養兒子，今日是年廿八洗邋遢，所以她提早跟足農曆新年習俗，實行浸浴洗走霉氣應節。雖然拍攝當日正值強烈寒潮持續襲港，不過Grace一於冇有怕，希望在猴年有一個新開始。
撰文：何慧斯
還有兩日就是農曆新年，現時獨力撫養兒子的林雅詩，復出後馬不停蹄頴銀，但新年習俗仍會做到足，她說：「我會繼續派利是㗎！我覺得呢樣係開心事，今年我會安排一個family trip畀囝囝、媽咪同Uncle、細佬同埋佢女友，雖然我囝囝都試過同婆婆一齊去旅行，但係今年我想更加warm啲、熱鬧啲，亦希望囝囝唔會覺得有太大轉變，好彩佢都OK，我仲同囝囝講農曆年會陪佢多啲，希望可以有8、9日時間陪佢，所以新年前要趕曬所有工作。」
逃出離婚陰霾
由全職主婦變做身兼家庭和事業的媽媽，面對這個轉變，Grace努力工作賺錢的同時，亦不會忽略照顧囝囝，她坦言是自己和兒子的一個學習的好機會：「𠵱家佢對我啲工作好有興趣，好似前排我上咗內地拍電影，我哋成日都視像，我都有畀現場啲嘢佢睇，佢都好似好奇同好有興趣。」她還說：「仲有一次我約咗一班好耐冇聯絡嘅小學同學聚會，我囝囝經過我食飯嘅地方，好開心話想上嚟搵我，仲要同啲auntie傾到唔捨得走，以前佢唔會咁樣，可能佢想我多啲時間陪佢，亦都想瞭解我做緊乜，所以你問我，𠵱家對我哋嚟講，係一個好好學習，教識佢做嘢係咁樣，畀佢睇嚇原來媽咪做嘢係咁。」
浸浴前，林雅詩預先準備好浴鹽放進浴缸。
林雅詩銳意過新生活獨力養子，希望新一年沖走霉氣。
一向愛錫囝囝的林雅詩，上月被拍到帶兒子去掃玩具。資料圖片
已經走出離婚陰霾的Grace，無論在工作和生活態度上都明顯樂觀和積極，她有感而發地說：「經過呢個情況，嘗試過好唔開心，情緒好低落同失控、爆喊，仲要做啲好儍嘅嘢，但係我覺得係時候要企出嚟，做一個強壯啲嘅女人同媽咪，唔想畀小朋友有太多負能量。我真係好感恩，身邊好多朋友好錫我，又幫我搵工，嚟緊我會有啲大計，好似會出飲食書，教人做小朋友餐盒，又會做嚇啲關於飲食嘅網上節目，仲有做飄移車手。」
場地提供：VEGAS360
from:
http://hk.apple.nextmedia ... 160206/19481570
