周星馳執導嘅《美人魚》早前喺北京開記者會，定咗喺大年初一（明年2月8日）喺內地上映，力撼美國動畫片《功夫熊貓3》、周潤發主演嘅《賭城風雲3》同郭富城演嘅《西遊記之三打白骨精》。雖然對手多又勁，但星爺早已封蝕本門，因為內地好多金融公司想同佢呢部戲合作，好似之前以3億買起咗《葉問3》嘅上海金融業新貴施健祥就提出包20億人民幣票房想買起呢部戲，但最後合作唔成。
內地金融公司《美人魚》吸引市民投資「我為星爺蓋票房」基金。互聯網圖片
星爺純利約3億
據知，星爺最後揀咗深圳錢升錢網路金融服務公司合作，為《美人魚》保底18億人民幣票房（內地每1億票房可取回3,300萬純利），即係保證星爺呢部戲，可以有約6億人民幣收益。扣番3億製作成本，估計星爺純利有3億人民幣。
錢升錢早排就推出咗一個叫「我為星爺蓋票房」投資項目集資，將投資者嘅收益同《美人魚》票房掛鈎，呢項投資鎖定期為6個月，18億票房以下保底年息為6%，18億以上就有更高回報率，22億以上最高收益有機去到15%。投資金額以10萬蚊起跳。聽起嚟好似好吸引，但其實風險都好高，萬一有乜山高水低，投資嘅錢分分鐘收唔番。馮仁昭打過畀星爺助手陳震宇，問佢《美人魚》係咪真係同錢升錢合作？佢話：「我其實都唔係咁清楚，等我瞭解嚇先。」但之後佢一直唔接電話。
撰文：馮仁昭
from:
http://hk.apple.nextmedia ... 151222/19421035
